Insawifiah ngaihna hre loah Rohluna puh

MNF party chuan thuchhuah siamin, School Education minister H Rohluna chu sikula zirtirtu khairual lo chungchanga insawifiah ngaihna hre loah an puh a, "Education department enkawlna kawnga Pu Lal Thanhawla sorkar hlawhchhamzia a pholang
chiang hle," an ti.

MNF chuan, minister H Rohluna’n 'Khaw-tlangin thawh-lawm thawha zirtirtu an ruai ṭhin tih a hriat thu leh, chu chu sorkar mualphona a ni,' tia a sawi chhuak chu School Education department enkawl kawnga sorkar hlawh-chhamzia a pholang niin an sawi.

Congress sorkarin MLA-te hriatpui loha zirtirtute sawn chhuah khap a nih thu an sawi chungin, anmahni vêkin an thutiam an bawhchhe zing hle nia sawiin, MNF chuan, "Hemi avang hian khaw tam tak, veng tam takah zirtirtu indaih lohna a zual phah nasa a ni," an ti.

MNF chuan, zirtirtu tam takin khawpuia insawn luh an duh a, thing-tlanga sawn chhuah an hreh tlangpui vek avangin MNF sorkar lai chuan zirtirtu an lakte chu a khaw mite duhsak bik an ni ṭhin tih an sawi a, "Hei hian zirtirtu indaih lohna a phuhru nasa ṭhin hle," an ti. Tuna zirtirtu indaih lohna chhâwk zangkhai a, zirtirtu contract-a ruai tur pawhin plan sum pawhpên tur pawh a awm tawh lo niin an sawi bawk.

Thingsai khuaa middle school-ah headmaster neih loh vang leh high school-ah science zirtirtu neih loh chungchangah School Education Minister chu insawifiah ngaihna a hre loah puhin MNF chuan, "Minister lainatawm tak a ni. Zirtirtu 2/1 dah lailâwk hi sorkar tan thil har a ni lo. Thingsaia zirtirtu an mamawhte hlawh hi kum khata Chief Minister-in zin nana helicopter a hman zat pawh a tling lo," an ti.