Hripui dona atana MLA fund thawh turah MNF MLA-te'n nuai 25 pek nghal an tum

Mizoram Assembly-a legislature party pathum - MNF, ZPM leh BJP MLA-te'n an hlawhpui (basic pay) aṭang leh MLA fund aṭanga Covid-19 dona atana sum an thawh turah, thlabi hlawh bik chu hlawh lâk hunah pawh ṭhen (cut) mai tura tih a ni. MLA fund aṭanga pek dan tur erawh party hrang hrangte kal dan tur a inang lo a, MNF MLA-te chuan pek nghal an tum laiin, nghah rih tum an awm bawk.

Vanglaini palai zawhna chhangin Assem­bly speaker Lalrinliana Sailo chuan, MLA hlawh­pui (basic pay) aṭanga pawisa thawh tur bik chu May thla hlawh lâk a hun aṭangin an thawh ṭan dawn a, sorkar official-te'n pawh ṭhen tur zat bituk chu an lak ṭhen nghal mai tur thu a sawi.

MNF, ZPM leh BJP MLA mi 35-te'n an hlawhpui aṭanga Covid-19 dona atana sum an thawh dan tur chu - Chief Minister-in 60%, Speaker, minister, Deputy Speaker leh Deputy Chief Whip-te'n 50% ṭheuh leh MLA pangngaiin hlawhpui aṭangin 30% ṭheuh a ni. Hlawhpui aṭanga pawh ṭhen bakah hian, Chief Minister-in Rs. 20,000, Speaker, minister, Deputy Speaker leh Deputy Chief Whip-te'n Rs. 15,000 ṭheuh an thawh bawk ang.

Thu dawn danin, kum 2020-21 financial year chhunga MLA tinin fund cheng nuai 150 an neihah MNF, ZPM leh BJP MLA-te chuan Rs. 50,00,000 ṭheuh Covid-19 do nan thawh an lo rél tawh bawk a; MLA fund hi tun hnai khan Finance aṭangin Rs. 37,50,000 ṭheuh a chhuak a, DC office aṭangin an la pe chhuak lo thung.

MNF Legislature Party (MLP) secretary L Thangmawia chuan Vanglaini palai zawhna chhangin, MLA fund Rs. 37,50,000 an hmuh mai tur aṭang chuan MNF MLA-te chuan Rs. 25,00,000 ṭheuh Covid-19 do nan thawh nghal an tum thu a sawi. 

L Thangmawia chuan, nuai 37.5 an hmuh tur aṭangin MNF MLA-te'n nuai 25 ṭheuh pek nghal tur an tih thu a sawi rual­in, "A rawn chhuakah hian nuai 50 pek tlak nghal tur a awm rih lo a. Chutih rualin, nuai 50 pe nghal thei an awm a, an pe tla nghal duh a nih chuan pek tlak nghal theih tho a ni a, rules kan siam anga kal thlap thlap kher turah kan ngai chuang lo a. Mahni remchan dan anga a hma thei ang bera nuai 50 pek ni mai turah kan ngai deuh," a ti.

MLA fund pek hun tur chungchangah L Thangmawia chuan, DC office aṭangin an account-ah a luh leh luh loh an la chian loh thu a sawi a; amah pawhin DC office (Saitual) aṭanga tihfel a nih veleh a pek nghal tur thu a sawi a ni.

ZPM Legislature Party (ZLP) secretary Dr Vanlalthlana chuan Vang­laini zawhna chhángin, MLA fund first instalment chhuak tawh nuai 37.50 chu Covid-19 do nan an pe nghal dawn lo a, an nghah rih tur thu a sawi a, "Tuna rawn chhuak hian kan pek tur zat (nuai 50) a daih lo a, pe nghal loin, kan nghak rih dawn a, pek zat tura kan tih erawh chu kan pe ngei dawn a ni," a ti.