Sorkar hotute'n inkhung hrannate an tlawh

State Level Task Force of Covid-19 chairman Lalnunmawia Chuaungo, chief secretary hoin Task Group on Qua­rantine Facilities-te chuan nimin khan Aizawl khawpui veng 

ṭhenkhata inkhung hranna hmun (quarantine facility/centre)-te an tlawh. CS chuan, thlawhtheihna hmanga lo hawte chu fimkhur thilah ni 14 khung hran an nih dawn thu a sawi.

Lalnunmawia Chuaungo chuan, Mizoram chu India ram hmun dang zawng aiin a fimkhur a, state dang aṭanga hawte endik vek niin, fihlim nia hriat hnuah chauh inkhung hranna hmunah kaltir an nih thu a sawi a, "Hetianga test paltlangte hi hmun ṭhenkhatah chuan khung hran ngaiah pawh an dah tawh loh laiin, Mizoramah chuan fimkhur thilah ni 14 kan khung leh vek a ni," a ti.

Chief Secretary chuan, thlawhna hmangin Mizote an rawn haw zel dawn tih sawiin, "Thlawhnaa chuangte hi test paltlang an nih avangin khung hran ngai lo tih an ni a, hei pawh hi Mizoramah chuan fimkhur thilah quarantine zel an ni dawn," a ti a; home quarantine-ah inthiarna an inṭâwm loh theih a him thu leh hmun danga khunghran ai pawhin a him zawk dan a awm thu a sawi.

Inkhung hranna bula awmte leh a bul kawngpuia kal chu mi ṭhenkhatin an hlauthawng ṭhin tih sawiin Lalnunmawia chuan, "Hei hi hlauh tur a ni lo. Covid-19 hi boruaka léng a ni lo a, khuh leh hahchhiaua chil per leh hnaptui aṭangtea darh a nih avangin quarantine centre bula kal hi hlauhthawn chhan tur a awm lo," a ti.

Task Group on Quarantine Facilities chairman Esther Lal­ruatkimi chuan, puitling sing chuang khung hranna tur ngaihtuah chu sorkar tan a hautak tih sawiin, "Kohhran puih­na dil a ni a, quarantine centre siam kawng­ah kohhrante inhawnna a ropui hle," a ti a; veng hrang hranga task force leh kohhrante ṭan­rualna chu India ram hmun dang aṭanga an hriatin Mizoramin fak a hlawh phah hle niin a sawi.

Task Group on Quarantine Facilities-te hian Electric Veng, Venghlui, Republic Veng, Venghnuai leh Dinthar venga quarantine facility-te an tlawh a ni.