Food Security Act hawn a ni Statistics mumal lo vangin FSA tan har

Food Security Act, kumin March 1-a Mizorama kalpui ṭan tur chu nimin khan Food, Civil Supply & Consumers Affairs minister John Rotluangliana'n Vanapa Hall-ah a hawng. Minister chuan, Mizorama FSA kalpui a nih lawk loh chhan chu statistics mumal leh rintlak tak neih loh vang a nih thu a sawi.

John Rotluangliana chuan, Mizorama FSA kalpui a nih mai loh chhan sawiin, "Ram zîm tê si-ah statistics mumal leh rintlak tak tak kan neih loh vang a ni," a ti a; Mizoramah ration buhfaia innghat an tam tih sawiin, "State dangah chuan FSA hman a nih dawn avangin ration card hmangtu an pun phah a, keini ramah chuan ration card-a awm mi nuai nga chuangin an chhawr dawn lo a ni," a ti.

Supply Minister sawi danin, FSA chhawr-tute'n thla khatah mi pakhat tan buhfai kg. 8 an la thei dawn a, chu'ng zinga kg. 5 chu kg.-ah Rs. 3-in an lei ang a, a dang kg. 3 chu kg.-ah Rs. 15 hisâpin an lei thung ang. FSA-in a huam loh chhungkuate pawh sorkarin thla khatah buhfai kg. 8, kg. khat Rs. 15 hisápin a leitir dawn a ni.

Minister chuan, Mizoram mipui nuai sarihin FSA an chhawr dawn tih sawiin, "Mizoramah ration card lem a tam em em a, ration card tibo tur hian department chuan unique ration card siamin, ration card lem 30,000 chuang paih a ni thei dawn," a ti.

FSA kalpui tur chu a felfai vek thei lo tih sawiin, John Rotluangliana chuan, "Chhungkaw indang thar an awm zel a, a fel hun kan nghah chuan a dik dawn lo. Fel lo leh sêlna tur a awm ngei ang, mahse, siam
ṭha zelin hma lam pan kan tum a ni," a ti a; FSA kalpui tur chu sorkarin tihkhawtlai a tum lo tih a sawi.

Rotluangliana chuan, FSA chhawr tur thlan dan a felfai tih sawiin, "Selection Committee-te'n party induhsak bikna awm lo leh inthliarna awm hauh loin an thlang. Complaint a awm thei em tih endik a nih vek hnuah kalpui theiha peihfel a ni," a ti a; FSA kalpuina tura department thawktute inpekna fakawm a tih thu leh internet chak loh avangin chhûn lamah hna a thawh theih loh ṭhin a, zan rei tak tak thlengin an thawk tih a sawi.

Supply Minister chuan, thingtlangah kudam a ruak nia sawi chungchangah, "A ruah chhan hi buhfai sem zawh vek vang a ni. Kudam ruah lai tak hian mipui fairèl bél a khat tihna a ni," a ti. Tun hma angin kawng a chhe lutuk tawh lo tih sawiin, "Dahkhâwl ṭeuh loin mamawh tawk mila pek a ni tawh. March thla hian bungraw phur rélin Bairabi a lo thleng dawn a, buhfai leh ni tin mamawh lak luh lamah awlsamna a thlen kan beisei," a ti bawk.

Food Security hawnna inkhawm hi FCSCA secretary Hrangtawna'n a kaihruai a; parliamentary secretary (FCSCA) TT Zothansanga pawhin thu a sawi. FSA nodal officer leh FCSCA deputy director John Ṭanpuia'n Food Security Act chungchang a sawifiah a; FSA-in a phût angin kudam hman tlak tawh lote leh him lote ṭhiah a ni a, NABARD bank loan hmangin kudam thar 27 sak a ni tawh tih a sawi.

Mizoramah Food Security Act

ω FSA hnuaiah Mizoramah mi 7,06,296-in buhfai an dawng dawn a, khawpuia cheng zingah mi 48.60% leh thingtlanga cheng mi 81.88%-in an dawng ang.

ω Ration card digitization kalpuinaah endik zel a ni a, ration card dik lo 30,000 vel tihtawp niin, ni 2,50,000 vel paih a ni.

ω AAY chhungkaw tinin thla khatah buhfai kg. 35 an dawng ang.

ω Priority household chhungkaw member tinin thla khatah kg. 5 chiuh an dawn theih avangin, Mizoram sorkarin chhungkaw member tinah kg. 3 ṭheuh a pek belh dawn.

ω FSA chhawr ve lo tur chhungkaw member tin tan kg. 8 ṭheuh kg. khat Rs. 15-in an lei thei ang.