Remna atana hmalakpui turin Group YMA-in CYMA ngen

Hmar people Convention-Democrat HPC(D) demand area chhunga YMA group hruaitute chu nimin khan Central YMA pisaah an lêng a; CYMA hruaitute hnenah an huam chhunga remna leh muanna a awm theihna tur leh an duhte an thlen.

HPC(D) demand area chhunga group YMA hruaitu CYMA pisaa léngte hi Chalfilh group YMA office bearer mi pali, Tuivai group YMA OB mi pahnih leh Tuisual group YMA OB mi paruk an ni a; CYMA aiawhin general secretary Lalhmachhuana'n a lo dawngsawng a ni.

YMA group pathum hruaitute chuan, mipuiin ram buaia awm an tlin tawh loh thu leh remna leh muanna a awm theih nana sorkar leh HPC(D) ten inbiakna dawhkan kîl ngei se an duh thu an sawi a; inbiak a nih theih nan a ṭul anga hma la turin CYMA an ngen a ni. Sorkar pawh nu leh pa an nihna hria a, remna leh muanna a awm theih nan a ṭul anga hma la tura an beisei thu an sawi bawk.