Kum 2016-17 chhunga Mizoram bank-te loan pek theih zat vbc. 959

National Bank for Agriculture and Rural Development (NABARD) chuan nimin khan Aijal Club-ah State Credit Seminar for Mizoram, 2016 an buatsaih a; Governor Lt.Gen. Nirbhay Sharma-a'n a hmanpui. Kum 2016-17 chhunga Mizorama bank hrang hrang aṭanga loan pek chhuah theih zat chu cheng vbc. 959 a nih thu tarlan a ni.

Governor chuan, Mizoram chu thlai chi tinreng thar theihna hmun a nih thu sawiin, "Ruahtui tamna ram a nih piah lamah Mizo mipuite'n chaw atan an rin ber buh thlenga khamkhawp thar theihna hmun a ni. Agriculture leh horticulture hmanga state intodelhah Mizoram siam a nih theihna atan tui lakna, kawlphetha leh khawl a pawimawh hmasa a ni," a ti.

Thla riat chhung Mizoramin ruahtui tam tham tak a dawn chu dahkhawlna ṭha tâwk siam a nih loh vangin ṭhál leh thlasik thlai tam tak thar a nih loh ṭhin thu sawiin, Larsap chuan, khawl leh mithiamte puihna hmanga tuna lo neih dan Mizote'n an kalpui mek her danglam chuang lo a, organic farming changtlung zawka chhuah a pawimawh thu a sawi.

Larsap hian NABARD-in state hmasawnna atana loan hman ṭul-na hrang hrang zirchianna leh inkaih-hruaina bu a siam, State Focus Paper chu tlangzarh nghal a ni.

Finance minister Lalsawta pawhin thu sawiin, Mizoramin sorkar a neih ṭan tirh chuan sorkar chu ram chhung inrêlbâwlna chiah kengkawhtuah an ngai ṭhin niin a sawi a, "Hun lo kal zelah sorkarin huang zauhin, lo neih kawngah pawh zirtirtu a ni a, demonstration farm-ah hralh tur ni lo thlai huante pawh a lo nei chho zel a ni," a ti.

Lalsawta chuan, Mizote'n loan an rûl ṭha loa sawi ṭhin chungchangah "Leibâ rûl ṭha lote hian pawisa neih thúr thûr àwm a ni a, mahse, ba rûl ṭha apiang an dingchang zawk a ni," a ti a; ba rulh kawngah Mizote'n ṭan an lâk a ngaih thu a sawi.

Inkhawma tarlan danin, NABARD-in kum 2016-17 chhung bank-te'n loan an pek chhuah theih zat an chhût chhuah chu cheng vbc. 959 a ni a, chuta ṭanga 48% chu crop loan leh 35% chu Ministry of Micro Small and Medium Enterprises loan a ni.