KHAWTHLIR

Heroin man

Excise & Narcotics department (END)-a Anti-Narcotics Squad chuan nimin chawhma dar 11:15 khan Upper Republic-ah heroin gram 19 leh a neitua puh David Zonunmawia (34) s/o Kaphnuna, Upper Republic nia inchhál an man. Anti-Narcotics Squad leh SRS-te ṭangkawp pawhin Thawhlehni tlai dar 5:45 khan Bawngkawnah heroin gram 65 leh a neitua puh Lallianmawia (29) s/o Thlamuana, Bawngkawn nia inchhál an man bawk.

Tanpuina sem

North Eastern Region Textile Promotion Scheme (NERTPS) hnuaia Cluster Development Project atan Sawlengah handloom cluster-a puantah zir chhuak mi 70 hnenah workshed sakna tur sem a ni. Mi pakhat tan Rs. 26,000ṭheuh bakah, thla li atan stipend mi pakhat tan Rs. 2,400 ṭheuh sem a ni.

Health camp

AH&Vety department chuan Thawhlehni khan BNRGSK hall, Khawlailungah Awarness Campaign cum Animal Health Camp an buatsaih. Health camp-ah hian ran chi hrang hrang 160 an entir a ni.

NLUP sem

Kolasib-a AH&Vety department chuan nimin khan NLUP hnuaia bawng lian vulh thlangtu mi 56 hnenah bawng in sakna tur Rs. 19,000
ṭheuh an sem.

Truck-in chíl hlum

Lalremruati (40) d/o Lalnunsanga, Phunchawng Mel-10 chu February 23, 2016 tlai dar 4:30 vel khan an vengah truck-in a chil hlum. A chiltu hi Serchhipa dah tur buhfai phur AS-11 BC-9152 a ni a, Lalremruati hi a hmunah a thi. Truck hi a tlân tlang a, a thlang deuhah driver Bodrul Islam Laskar leh handyman Jakir Hussain Laskar, Lailapur mi ve ve chu an tlanchhia a, zan dar 8 velah 5th IR police-te'n an man a, Sairang Police Station-ah an pe a ni.

Office hawng

Agriculture director Dr. Lalzarliana chuan Thawhlehni khan Hnahthiala RKVY sum hmanga sak SDAO office leh SDAO quarter a hawng.