HIV/AIDS dona Project Sunrise hawng

25th February, 2016

Ruihhlo leh HIV/AIDS dona tur programme thar, Project Sunrise chu nimin khan Health minister Lal Thanzara'n IPR directorate conference hall-ah a tlangzarh. Lal Thanzara chuan, HIV/AIDS dona kawngah kohhrante'n nasa zawkin ṭan la se a duh thu a sawi.

Health Minister chuan, HIV/AIDS chungchang leh a kàina chhan lian tak, mipat hmei-chhiatna hman sual chungchang chu kohhran huang chhungah an la sawi tam tawk loa a hriat thu sawiin, "Kohhrante hian HIV/AIDS chungchang hi nasa zawkin buaipui se. Lâm nasat leh hla nawn tluk zeta thlarau lam thil khawih a ni," a ti.

Lal Thanzara chuan, ruihhlo ngaite leh HIV/AIDS veite enkawlna drop-in centre chu veng tam takin an venga awm atan an la duh lo tih sawiin, hemi kawng-ah hian rilru zau put a ṭul thu a sawi a; March thlaa Assembly budget neih laiin MLA-te zingah HIV/AIDS awareness campaign neih tumin thuneitute an dil thu a sawi bawk.

Health Minister chuan, sorkar-in sum lamah harsatna a tâwk chungin ruihhlo ngaite leh HIV/AIDS veite enkawltu NGO-te'n ṭhahnemngai taka an thawk reng chu fakawm a tih thu sawiin, nasa zawka ṭan la turin a fuih a, "Khawtlang leh kohhrante thawhpui thiam a ngai a ni," a ti.

Lal Thanzara chuan, Project Sunrise chu HIV/AIDS donaa
ṭangkai tak a nih a beisei thu a sawi a; Project Sunrise kalphung in-ziah-na booklet a tlangzarh nghal.

Project Sunrise hi kum nga chhung kalpui tur a ni a, February 6, 2016 khan Imphal, Manipur-ah prime minister Narendra Modi-a'n a hawng a ni.

Nimina Aizawla Project Sunrise hawnna inkhawm hi Hospital & medical Education director Dr Lalbiakkima'n a kaihruai a; Health department leh MSACS-a hotute bakah, HIV/AIDS dona kawnga thawktu NGO leh kohhran hruaitute an tel.

Inkhawmah hian MSACS project director Dr Lalmalsawmi Sailo-in Project Sunrise a sawifiah a; chawhnu lamah People Who Inject-Drugs Targetted Interventions chungchang zirho nghal a ni.

Project Sunrise kalpuitu ber chu Family Health International (FHI 360) a ni a, hmarchhak state pariatah National AIDS Control Organization (NACO) leh state tina AIDS Control Society-te thawhpuiin hma an la ṭan mek. Hmalakna atana sum tumtu ber chu Centre for Disease Control (CDC) a ni.