Fûr atan inbuatsaih dan tur sawiho

Aizawl District Disaster Management Authority (ADDMA) chu nimin khan an chairman, Kannan Gopinathan, Aizawl DC hoin a pisaah an ṭhukhawm a; fûr lo thleng tur atana inbuatsaih dan tur an sawiho.

Kannan Gopinathan chuan, fûr thlen hma thla hnih la awma meeting koh a nih chhan chu, inbuatsaihna hun thâwl zawk a awm theih beisei vang a nih thu a sawi a; zonal officer-te chu an chan zone ṭheuha leimin thei awm apiangte enfiaha report thehlut turin a hrilh.

National highway leh state highway kama leimin hlauhawm zualte ngaih pawimawh hmasak ni se a duh thu sawiin Aizawl DC chuan, "Kawng tê zawkte pawh hunin a daih dan azirin ngaihtuah zui zel ni se. Leimin hlauhawm laite venhimna tur senso chu kawng hrang hranga dap a ni ang," a ti.

Meeting-ah hian Aizawl district chhunga zone 19-a zonal officer-te bakah PWD leh DMR hotute an tel a ni.