Lungleiah mock drill buatsaih

Disaster Management & Rehabilitation (DMR) department leh National Disaster Management Authority (NDMA) ṭangkawp chuan, nimin khan Lunglei khawpuiah 'Earthquake Mega Mock Drill’ an huaihawt.

Mock drill ṭan nan Lunglei DC pisa aṭangin chawhma dar 11-ah siren tihrîk a ni a, Lunglei khawpuia hmun pali - Sobji Market, Chanmari; Saikuti Hall, Venglai; JB College, Bazar Veng leh Serkawn road-ahte lirnghing vanga chhiatna thleng angin lem an chang a ni. Medical duty, police, MPRO, traffic police, NDRF leh SDRF, YMA Lunglei sub-headquarters-a Search & Rescue Team leh adventure club team-te an tel a, chhanchhuahna hna leh a ṭul angte an thawk a ni.

Mock drill neih zawhah DC conference hall-ah a kaihhnawih district official - police, medical, NDMA, SDMA, Assam Rifles, BSF, NGO leh volunteer hrang hrangte an thukhawm a; NDMA senior consultant Shivaji Singh leh joint adviser DS Sindhu kaih-hruaina hnuaiah an sawiho a ni.