Bangalore aṭangin mi 1,400 vel rawn haw

Bengaluru khawpui leh a chhehvela inkhàrkhip vanga Mizo tangkhang mi 1,400 velte chuan Mizorama haw turin nizan khan rélin Bangalore an chhuahsan a, May 28, Ninganiah Bairabi rél chawlhhmun an thlen beisei a ni.

Bangalore aṭanga thu dawn danin, Bangalore khawpui chhung leh Karnataka state chhung hmun hrang hranga Mizo tangkang, Mizorama haw tura inhriattir chu mi 1,540 an ni a, niminah medical screening tihnaah erawh chuan mi 1,440 vel an inlan thung. Karnataka sorkar leh Mizoram sorkar inbiak remna angin an hawna atan special train ruahman a ni. 

Haw turte chu an hriselna dinhmun enfiah (medical screening) vek a ni a, medical screening pal­tlangte chauh haw thei tur niin, paltlang lote chu an haw thei rih dawn lo. An chuanna rélah district hrang hranga mite chu a theih chin chinah pindan (compartment)-ah a hlâwma awmtir an ni dawn a, compartment tina leader tur Bangalore Mizo Joint Committee (BMJC) chuan an ruat vek a ni. Pindan hranga mite chu inkal/inlènpawh phal a ni lo.

Haw turte tan hian BMJC chuan ei leh in tur (food package) an pài dawn a, ei leh in tur atan cheng nuai hnih vel an séng. Rél ticket pawh 40% chu BMJC-in Bangalore Mizo Association (BMA) kaltlanga CM Relief Fund aṭanga sum an hmuh hmangin an tumsak bawk.

Hetih lai hian, Bangalore aṭanga Mizorama haw turte rél chawlhhmuna an hriselna dinhmun enfiah vanga hun rei tak an awm khawm chhungin nimin khan Muslim pawlte chuan ei leh in tur ṭhahnem tak an pe a ni.