Local council member-te tan training buatsaih a ni

Aizawl Municipal Corporation (AMC) chuan February 23, 2016 khan AMC auditorium-ah Aizawla local council-te tan training thawhkhatna an buatsaih a; AMC mayor PC Lalhmingthanga'n a hawng.

Training-ah hian local council-te mawhphurhna hrang hrang leh AMC-in hma a lak mekna - Building Regulations, parking, streetlight, bawlhhlawh paih leh property tax khawn chungchanga thawhho dan tur an zirho a ni.

Mayor PC Lalhming-thanga chuan, AMC hnuaia hmasawnna hna thawh mekte vil uluk tum a nih thu sawiin, hna thawk ṭha lote chu a ṭul anga hrem an nih tur thu a sawi a; AMC hnuai-a hna thawhte enfelpui turin LC member-te a ngen.

Mayor chuan, "Property tax khawn khawm aṭanga 80% chu mipui hnena lêt leh tur a ni a, property tax a luh tam leh mipui tan hna ṭangkai tam zawk thawh theih a ni ang,''a ti. Property tax khawn a nih hunah AMC hnathawkte a theih ang anga lo pui ṭheuh turin LC-te chu a sawm a ni.

Local council member--te tana training buatsaih hi AMC deputy mayor Lalringliana'n a kaihhruai a; AMC Ward-I aṭanga Ward-X chhunga LC member-te an tel. AMC Ward XI aṭanga Ward XIX inkara LC member-te tan vawiinah training buatsaih leh a ni ang.