Hlawh bat zat tur tihfel a la ni lo FMGEW-in hlawh batah thu dawn an la nei lo

Sorkar hnathawk pawl hrang inzawmkhawmna, Federation of Mizoram Government Employees and Workers (FMGEW) chuan, sorkarin a hnathawkte hlawh a bat tur chungchangah sorkar hnathawk association aṭangin thu dawn an la nei lo. Covid-19 leh inkhàrkhip vanga inrenchem dan tur ngaihtuahtu, Committee on Economy Measures chuan group-A 15%, group-B 10%, group C leh D-te 5% bat rih an rawt a; chutih laiin, hlawh bat zat tur tihfel a la ni lo.

Vanglaini palai zawhna chhangin FMGEW hruaitute chuan, "Hlawh bat tur chu May 22 khan kan hre chauh a, sorkar chawlh a ni zui nghal a ni. Tun dinhmunah chuan association aṭangin hlawh bat tur chungchangah thu dawn kan nei lo. Hemi chungchang hi ngaihtuah tumna pawh kan nei rih lo," an ti.

FMGEW hruaitute chuan, sorkar hotute'n sum leh pai harsat thu an sawi avangin hlawh bat chu thil àwm lo lutukah an ngaih loh thu sawiin, "Chutihrualin, a thuphungin hlawh bat hi kan la hre chauh a, engtiang takin nge kalpui a nih dawn kan la hriat loh avangin thil sawi lâwk vak theih a ni lo," an ti a; hlawh bat percentage a sàn chuan an tan khawsak ngaihna a awm loh tur thu an sawi.

Tarlan tawh angin, May 22, 2020-a Council of Minister ṭhukhawm chuan Committee on Economy Measure-in rawtna an neihte an ngaihtuah a, ṭhenkhat tidanglamin an pawm a ni.

Committee on Economy Measure-in rawtna a siam dan chuan, sorkar hnathawk group A hlawh aṭangin 15%, group B aṭangin 10%, group C leh D-te hlawh aṭangin 5% chu thla thum, June-August 2020 chhung batsak a rawt a ni. An rawtna chu Cabinet meeting chuan siam remin, group-D leh a hniam lam deuhte chu ngaihhnathiam a, hlawh bat hun leh bat zat tur chu sum dinhmun thlir chunga Finance department ruahman turin an dah.

Committee on Economy Measure chuan, thla tin hlawh atan bik cheng vbc. 290 vel a kal a ngaih ṭhin thu tarlangin, "Hlawh batsak hian sorkar account aṭanga sum chhuak thla tin cheng vbc. 35 velin a tihniam thei dawn. Sum dinhmun a ṭhat hunah a pung awm loin, instalment-a rulh leh mai tur a ni," an ti.

•    Group A 15%, Group B 10%, Group C leh D 5% hlawh thla thum chhung bat.

•    Thla khata Rs. 40,000 aia tlem hlawhte huamtir loh.

•    Deputation-a Mizorama awm mek all India service-te pawh huamtir.

•    Grant-in-aid (salary) aṭanga hlawh pek PSU, govern­ment aided institution (sorkar puih zirna-in), society leh autonomous body-te huam tel tur.

•    Police leh Health department-a group B, C leh D-te huamtir loh.