ZPM nen thawhho tumna kan nei lo; Mizoramah BJP a sorkar a ngai - Rijiju

Mizoram MLA inthlanpui awm tura central BJP-in in-charge atana a ruat Kiren Rijiju, union minister chuan Mizoram hmasawnna atan BJP sorkar a pian a ngai niin a sawi a, "ZPM thawhpui tumna kan nei lo," a ti.

Thuthar thehdarhtu ṭhenkhatte'n October 20, 2023-a Hotel Regency-a an kawmnaah Kiren Rijiju chuan, political party zawng zawng nen inlaichìnna an neih ṭhat thu leh an thawhpui theih vek thu sawiin, "Congress party kan thawhpui thei lo a, an sorkar laiin hmarchhak an tichhe vek. Inthlan hi keimahniin kan hmachhawn dawn a, seat pawh kan la ṭeuh ang," a ti a, BJP tel lohna sorkar Mizoramah a pian loh tur thu a sawi.

ZPM nen thawhho an tum nia sawi chungchang zawhna chhángin Rijiju chuan, "Thawhho tumna pakhat mah kan nei lo. An leader hi a history ka hria a, party chhuahsan a, party dang zawm a, party din leh a ni tih vel hi ka hriat dan a ni. Hmaichhanah kan la inhmu lo. ZPM Leader dinna bialah hian amah khing turin candidate kan dah. Mahni ngeiin inthlan kan hmachhawn dawn," a ti.

Kiren Rijiju chuan, MNF nen NDA-ah thawhhona ṭha tak an neih thu sawiin, "MNF pawh huatna kan nei lo a, Pu Zoramthanga pawh ka office-ahte lo kalin kan inhre ṭha. Mahse, sorkar laipui scheme-te Mizoramah an tihlawhtling ṭha thei lo erawh ṭha kan ti lo," a ti a; sorkar laipui scheme ṭha tak takte Mizoramah hlawhtling taka kalpui a nih theih nan BJP telna sorkar ngei a pian a ṭul thu a sawi.

Union Minister Rijiju chuan, BJP-in kum 2014-a sorkarna an siam hmain hmarchhak state-ah Mizoram leh Sikkim tih loah helna a awm vek nia sawiin, "Ṭhalaite'n hna an neih loh avangin an hel a ni. BJP a sorkar hnuah Minister of State (Home) ka ni a, hmarchhaka hel zawng zawngte remna kan siampui vek. Hmasawnna a thlenna turin remna a awm a ngai a, hmarchhak state-te'n tunah chuan nasa takin hmasawnna kawng an zawh tawh," a ti.

BJP leh Kristianna inhal anga sawi a ni ṭhin chu a dik lo nia sawiin Rijiju chuan, "Thu dik lo thehdarh a ni hi a pawi ka ti tak zet a, mipuiin thu dik tak an hriat theihna atan theihtawp kan chhuah dawn. BJP hi sakhaw hrang hrang awm khawmna a ni a, kei ngei pawh Hindu ka ni lo a, mahse, union minister niin portfolio pawimawh tak tak ka chang ṭhin," a ti a, BJP MP leh MLA ṭhahnem tak an awm thu a sawi.

Kiren Rijiju chuan, Mizoram inthlan turah membership drive an neihna bialah chauh candidate an dah thu sawiin, "Candidate rawn dil an awm a, mahse, tuna kan dahna bak ṭul kan ti lo. MLA inthlan lo awm leh hunah chuan mipuiin BJP-in hmasawnna a thlen nasatzia leh Kristianna nen a inhal lohzia an hre tawh ang. Aizawl bial zawng zawng pawh candidate kan dah tawh ang a, a malin sorkarna kan siam thei tawh ang," a ti.

Rahul Gandhi-a'n Mizoram a tlawh ṭuma BJP leh Kristianna a sawi chungchanga zawhna chhangin Rijiju chuan, "BJP beihna tur dang min hre lo a, BJP leh Kristianna bak sawi tur a hre lo. Congress sorkar lai tluka Kristiante nêkchêpna a awm lo a, mante an tâwk hial ṭhin, en lêt mai theih a ni. Kan state Arunachal Pradesh-ah phei chuan Mother Teresa a luh pawh an phal ngai lo," a ti a, dâwt hmanga BJP beiah Congress party a puh.