CM candidate zingah Lalsawta a hausa ber

Mizoram inthlanpui awm turah political party pathum - Indian National Congress (INC), Mizo National Front (MNF) leh Zoram People Movement (ZPM) te'n Assembly bial tin an chuh dawn a; candidate-te'n affidavit an thehluha a lan danin, party pathuma chief ministerial candidate zingah INC CM candidate Lalsawta a hausa ber.

MLA inthlanpuia candidate-te'n nomination (affidavit) an thehluha a lan danin, party lian pathum chief ministerial candidate zingah Congress party CM candidate Lalsawta a hausa ber a; rosum khawih lak sawn theih (moveable) Rs 32,05,020 hû leh lak sawn theih loh (immoveable) Rs 4,73,50,000 hû a neih belh khawm chu Rs 5,05,55,020 hû a tling.

Rosum neih belh khawmah Lalsawta dawttu chu ZPM CM candidate Lalduhoma a ni a, Rs 4,03,22,738.07 hu a nei a, chu'ngte chu lak sawn theih Rs 1,03,22,738.07 hù leh lak sawn theih loh Rs 3,00,00,000 hû a ni.

Affidavit-a tarlan dan chuan, CM candidate zingah MNF president leh chief minister ni lai Zoramthanga'n rosum a nei tlem ber a, lak sawn theih Rs 65,76,152.10 hû leh lak sawn theih loh Rs 1,60,00,000 hû, a vaiin Rs 2,25,76,152.10 hû a nei.

Pawisa neih zat (kuta kawl mek leh bank-a dah) bik tarlanah chuan, ZPM leader Lalduhoma'n nei tam berin, Rs 89,07,838.07 a nei a, MNF CM candidate Zoramthanga'n dawtin, Rs 32,26,162.10 a nei. MPCC president Lalsawta chuan Rs 20,46,964 a nei thung.

Hetih lai hian, party lian pathum chief minister candidate-te zingah hian, in khata an chenpui an chhungte (nupui leh fate) rosum neih zat tarlanah chuan, Congress president Lalsawta te chhungkua an hausa ber a, rosum Rs 6,18,08,578 hû an nei. MNF president Zoramthanga te chhungkuain rosum Rs 5,00,41,245.33 hû an nei a; ZPM CM candidate Lalduhoma te chhungkua chuan Rs 4,13,88,226.10 hû an nei a ni.

Chief ministerial candidate pathumte hi kum 70 chung lam vek an ni a, a upa ber chu Zoramthanga niin, kum 79 a ni. Lalsawta chu kum 77 a ni a, Lalduhoma chu kum 73 a ni.