College zirtirtu sawn tawh sût phûtin Siaha khawpuiah kawng zawh a ni

Saiha College zirlaite chuan an zirtirtu a nghet (regular)-a thawk pakhat Aizawla sawn (attach) tawh chu sawn a nihna sût phûtin nimin khan Siaha khawpuiah kawng an zawh. Zirtirtu sawnna pek chu sût (cancel) a nih thu nimina sorkar thuchhuah chuan a tarlang.

Thu dawn danin, Saiha College-a assistant professor Lalrinpuii Rokhum, English depart­ment chu tun hnaiah J Thankima College-ah sawn a ni. Sorkar thil tih danah an lungawi loh avangin Saiha College Students Union chuan nimin khan kawngzawh an huaihawt a, zirlai ṭhahnem tak an tel.

Kawngzawhah hian zirlaite chu Saiha College aṭangin Siaha Bazar traffic point-ah kalin, New Siaha Vety Kâwn thleng an kal a; Bazar traffic point leh Vety kâwnahte SU hruaitute'n thu an sawi a ni.

Saiha College SU hruaitute chuan Sep­tember 22, 2023 khan Higher & Technical Edu­cation minister Dr R Lalthangliana a pisaah hmuin, an college-in harsatna an tawhte an thlen a; zirtirtu indaih lohnaah hma la tur leh Geography department din tura hma lakpui turin an ngen a ni. Kum 2008-a Science leh Commerce din tura thuchhuah awm sa bawhzui turin an ngen bawk.

Zirtirtu an mamawh belh thu an thlen laiin, zirtirtu dah belh loin zirtirtu a ngheta thawk mek pakhat chu Aizawlah sawn a ni ta zawk a, chuvang chuan Saiha College SU leh zirlaite chu an lungawi lo hle a ni. Tun hnaiah English department aṭanga mi pathum lak chhuah a nih tawh thu leh regular teacher pakhat mah an neih loh thu an tarlang.

Hetih lai hian, nimina sorkar thuchhuah chuan, Saiha College English department-a assistant professor Lalrinpuii Rokhum transfer order sût a ni a, a post ngaiah dah lêt leh a nih thu a tarlang. Transfer order sûtna thupek chu nimin khan tihchhuah a nih thu tarlan a ni.