Congress pary-in an sorkar chuan ṭhalai tan hna 1,00,000 siam an tum

Mizoram Pradesh Congress Committee (MPCC) thupuangtu (chief spokesman) Ronald Sapa Tlau chuan nimin khan Congress Bhavan-ah thuthar thehdarhtute a kâwm a; Congress party an sorkar chuan Young Mizo Entrepreneurship Programme (YmElevate) an din dawn a, ṭhalaite tan hna 1,00,000 an siam dawn thu a sawi.

Rondal Sapa Tlau chuan kumin MLA inthlanpuia Congress party intiamna, manifesto a sawifiah a; sorkar ṭha, langtlang leh eirûkna laka fihlîm an din dawn nia sawiin, "Congress sorkar chuan khaw chhung mipuite ro inrelna a tichak ang a, village council leh urban local body-te hnenah thuneihna sang zawk, mawhphurhna sang zawk leh sum tam zawk a pe ang," a ti.

Mizoramah hmasawnna tluantling a thlen theih nan kawngpui, airport leh kawlphetha ṭha leh changtlung zawk an siam dawn tih sawiin Ronald Sapa chuan, "Kut hnathawktute leh mahni kutkawiha eizawngtute'n eizawnna ngêlnghet an din a, hmasawnna tluantling leh hlawhtlinna an neih theih nan Ṭang Puihna hmangin kan pui ang," a ti a, Young Mizo Entrepreneurship Programme (YmElevate) dinin, ṭhalaite tan startup fund siamin hna 1,00,000 siam an tum thu a sawi.

Ronald Sapa chuan, Congress party an sorkar chuan sorkar hnathawk nghet awm lohna chhungkaw tin tan pawisa hman hmasak ngai loa damdawi-ina inenkawl theihna tur health insurance, Rs 15,00,000 thleng hman theihna tur an pe dawn tih a sawi a, "Cancer leh natna khirh bik inenkawlna la mekte ṭanpui nan kum tin budget-ah Rs 5,00,00,000 kan dah dawn a, Old Age Pension hi Rs 2,000-ah kan tipung ang," a ti.

MPCC hruaitute chuan, gas (LPG) connection nei, BPL chhungkuate leh chhungkaw lu ber hmeichhia a nihna chhungkuate'n gas bûr khat Rs 750-a an lei theih nan subsidy an pek dawn thu te, hmeithai leh rualbanlote ṭanpuina National Social Assistance Programme hnuaia kalpui chu Rs 2,000-a an tihsan dawn thu te, sorkar hnathawkte tan Old Pension Scheme an kalpui dawn thute an sawi bawk.

MPCC HRUAITUTE TARLAN ṬHENKHAT

■ Aizawl hi chên hleih theih loh khawpin a chêp a, khawpui area emaw, Aizawl hnaia Aizawl thar din emaw kan ngaihtuah ang.

■ Aizawl traffic tawt zualna hmunah flyover siam a ni ang.

■ Restricted tender hman dik loh tihtawp hi kan hna hmasa a ni ang.

■ Electric bill dik taka siamin, BPL chhungkuate tana zângkhài thei ang ber turin ruahmanna kan siam ang.

■ ZMC hi regional medical college/institute emaw, AIIMS ang chi zirnaa leh a nih theih nan hma kan la ang.

■ Pawl 12 pass zinga zirna sang zawk chhunzawm duh, BPL chhungkuate hnenah zirna pui turin laptop kan pe ang.

■ Mizoram chungchanga data inang a awm theih nan 'One state, one statistics' nei tura hmalak a ni ang.

■ Sorkar hmalaknate mipui tana dil chhuah kher ngai loin sorkar website-ah tarlan ṭhin a ni ang.

■ Dan loa thil tihna reng reng man chhuah a nih chuan hrem lohin an chhuak lo ang.