Pathianin kan mamawh tâwk MLA min pe ngei ang - Zoramthanga

MNF president Zoramthanga chuan, hmun hrang hrangah nationalism thlipui a tleh thar leh mek nia sawiin, MNF-in sorkar tura an mamawh tâwk Pathianin MLA a pe ngei dawn niin a sawi.

MNF party-in nimina an din champha vawi 62-na Mizo Hnam Rûna an lawmnaah thusawiin Zoramthanga chuan, "Hmun hrang hrangah nationalism thlipui a tleh thar leh mek a, MNF-in lawm luh kan nei nasa hle. Kan bialah phei chuan lawm luh tur a inkahpupchaw nasa hle. MNF hi Pathianin kawng laklawhah min kalsan lo ang, sorkar tura kan mamawh tâwk MLA min pe ngei ang," a ti.

Zoramthanga chuan, ṭhangtharte hnam thuthlungah an harh thar mek nia sawiin, "Ṭhalaite pawimawhna hriain kan manifesto-ah pawh anmahni chhawmdawl a, hma lam an pan theihna tur kan dah a ni," a ti a; ṭhangtharte'n natio­nalism an champion-pui zel dawn niin a sawi.

Zoramthanga chuan, MNF chu mi tlawm tê têin October 22, 1961-ah Laldenga in, Tuikhuahtlangah an din tih sawiin, "MNF hi Pathianin ropui taka ram hruai tura a duan a ni mai lo a, hreawm tam tak tuar tura a duan a ni a, hreawm tam tak a tuar rêng a, rambuai, inkah, president's rule puan hnan leh thil tam tak a tuar. Chuti chung chuan India rama party hlun leh nghet ber pawl ni turin kum 62 zet Pathianin a hruai ta a ni," a ti.

MNF President chuan, Myanmar leh Bangladesh aṭanga Zo hnahthlak rawn ráltlante thawn kir tura sorkar laipuiin a ti chungin an hum tlat tih a sawi a, "Central sorkar thu zâwm loin kan hum tlat zel dawn," a ti.

Assam ramri aṭanga Mizo police hnûk lêt tura tih an nih pawhin, 'CM aṭanga ka bàn a ngai ang,' tia a chhàn avangin an nawr zui ngam ta lo niin a
sawi bawk.