District hrang hrangah inthlan atan inbuatsaih

Mizoram Legislative Assembly general election 2023 neih turah district hrang hrangah ngawrh takin inbuatsaih mek zel a ni a; niminah pawh khan hmun hrang hrangah inpuahchahna kalpui a ni.

Siahaah chuan nimin khan general observer PS Pradyumna, IAS chuan DC Conference Room-ah sector magistrate-te meeting a neihpui a; District Election Officer, Siaha SP, returning officer pahnih leh sector magistrate-te an tel kim.

PS Pradyumna chuan, inthlanna felfai leh thianghlim nei turin sector magistrate-te an pawimawh hle tih sawiin, an bial chhunga BLO-te nen an inhriat chian hle a ngaih thu a hrilh a, whatsapp group siam a, BLO-te nena chanchin inhrilhpawh zung zung ṭhin turin a chah. Polling ptation-te vawi hnih tal tlawh turin a chah bawk.

Nimin khan Mamit Higher Secondary School-ah Election Commission of India-in India mipui khua leh tui, vote nei zawng zawngin vote an thlak vek theihna tura hmalakna, Systematic Voters' Education & Electoral Participation (SVEEP) campaign buatsaih a ni a, IPRO/nodal officer Dr Saithantluangi Zote-in thil pawimawhte zirlaite a hrilhfiah.

Dr Saithantluangi Zote chuan, vote thlak chu vote neite tihmâkmawh, an mawhphurhna, khua leh tui an nihna anga danin a phût a nih thu a sawi a; vote nei zawng zawngte chu kumina Mizoram inthlanpuiah vote thlak ngei turin a chah. SVEEP campaign-ah hian quiz buatsaih a ni bawk.

Champhaiah chuan inthlan ralmuang leh felfai neih a nih theihna tura dan leh thupek kenkawh leh venhimna chungchanga hmalakna leh inpuahchahnate DC Conference Hall-ah thlirho a ni a; Champhai district tana general observer Dr Ranjit Kumar Singh, IAS leh Sanjay Kumar, IAS te, expenditure observer Abhishek J Jain te, police observer Sukesh Kumar Jain, IPS ten an telpui.

Election observer-te chuan, Champhai district chu Myanmar nen ramri thui tak nei a nih avang leh ruihhlo leh thil dang tawlh rûkna luhká a nih avangin dan leh thupek kenkawh leh venhimna kawnga fimkhur taka hmalak a ṭul thu an sawi a; venhimna lama mawhphurtu Police, Assam Rifles, CAPF leh enforcement agency dangte chu ṭha taka inpuahchah tur leh inpawh tlang taka thawkho turin an chah.

Inthlan laia Champhai district-a venhimna hna thawk turin central armed police force (CAPF) company pahnih an thleng tawh a, company pahnih dang thleng leh tura beisei a ni. CAPF awm tawhte chuan district chhung hmun hrang hrangah patrolling an nei mek a ni.

Nimin vek khan Champhaiah ECI-in observer a ruatte hoin DC Conference Hall-ah sorkar thuneitute an ṭhukhawm a, Champhai district election officer James Lalrinchhana’n a kaihruai a, Champhai district-a election nodal officer 17 an tel.

Candidate-te sum hman chungchang, polling station-a tui, kawlphetha leh inkalpawhna kawng ṭha pek dan tur te, duty turte training pek chungchang te, media chungchanga inkaihhruai te, viote thlakna hmanrua chungchangte leh thil pawimawh dangte an sawiho a ni.

Champhaiah hian nimin khan polling party-te duty-na tur thlanna kalpui leh a ni bawk. District pumpui atan polling party 102 siam a ni a, polling party pakhatah mi pali - presiding officer leh assistant presiding officer pakhat ve ve leh polling official pahnih zel an awm dawn a, an vaiin mi 408 ruat an ni.

Kolasib-ah pawh nimin khan vote thlak nía inthlan vil tur micro observer atana ruatte tan DC Conference Hall-ah training buatsaih a ni a, Kolasib DEO John LT Sanga'n hmanpuiin, micro observer-te chu an mawhphurhna pawimawhzia hria a, fimkhur taka hna thawk turin a chah.

Training-ah hian Kolasib district-a assembly bial pathum atana micro observer tur mi 10 an tel a; master trainer Lalremruata Sailo, Vairengte SDO (Civil)-in thil pawimawhrte a hrilhfiah a ni.

Khawzawlah pawh nimin khan inthlan inbuatsaihna kalpui niin, general observer Amit Singh Bansal hoin Khawzawl DC Election Branch-ah polling official-te duty-te tur chinfelna (second randomisation) hun hman a ni a, Khawzawl DEO K Lalrohlua leh election officer Timothy R Lalhmangaiha ten an hmanpui.

Polling official atana computer-in a thlan chhuahte chu an thawhpui turte thlan chhuah a ni a; randomisation hi vawi khat la neih leh tur niin, chutah chuan an duty-na tur polling station thlan a ni ang.