Mipui leh Pathian mittlung ngeiin MLA fund hman a ni ang - Dr Mala

Mizoram Pradesh Cong-ress Committee (MPCC) treasurer Dr Lalmalsawma Nghaka chuan, Mizoram inthlanpuiah hlawhtlinna a chang a nih chuan MLA fund hman danah mipui leh Pathian mittlung ngeia hman leh hna thawh a tum thu a sawi.

Aizawl South-II biala Congress candidate Dr Lalmalsawma hian nimin khan Mission Venga block campaign office a hawnnaah thu sawiin, "Pathian khawngaihna azarah hlawhtlinna ka chang hlauh a nih chuan MLA fund hman danah, mipui leh Pathian mittlung ngeia thawh a ni ang. MLA fund hi infrastructure development piah lamah, bial chhunga mi harsa zawkte dâwm kân nante leh eizawnna atan ṭangkai tur thiamna lamah inzirtirna pek uar tur a ni ang," a ti a; chutianga hna a thawh theih nan hma lakpui turin mipui a sáwm a ni.