KHAWTHLIR

YMA inkhawmpui

YMA Inkhawmpui Lian vawi 74-na chu zanin dar 7 hian Zialung Rûn, Biateah ṭan a ni dawn a, October 26, 2023 thleng a awh ang. Inkhawmpuia tel turte chuan vawiin hian Biate an pan khawm dawn a, zanin hian palai lawm inkhawm neih a ni ang. October 25, naktukah rorel inkhawm neih a ni dawn a, November 26-ah kum 2023-2025 chhunga Central YMA hruaitu tur thlan tur a ni. October 26 zanah palai thlahna inkhawm buatsaih a ni ang.

Kuhva rah khap

Kolasib district magistrate John LT Sanga chuan thupek chhuahin, Kolasib district-ah dan loa kuhva rah lak luh leh district paltlang phal a nih loh thu a puang. Magistrate chuan, Kolasib district-ah dan phal loha ram pawn aṭanga kuhva lak luh a awm ṭhin tih hriat a nih thu tarlangin, "Kolasib district chhung khawi hmunah mah dan loin kuhva rah tu mahin an phur lut tur a ni lo a, a paltlang nan an hmang tur a ni hek lo," a ti.

Pûk luhchhuah tum

Zotrek Adventure Club member mi 30-te chuan khawvela sandtone cave thui ber Krem Puri, Laitsohum, Meghalaya luhchhuak turin October 21, 2023 tlai khan Aizawl chhuahsanin Meghalaya an pan a, AMC deputy mayor R Thanglura'n Vanapa Hall kawt aṭangin a vailiam. Km. 24.5-a thui Krem Puri luhchhuaktu turte hi mipa 20 leh hmeichhia 10 an ni a, nimin leh vawiin hian pûkah an luh beisei niin, vawiin tlaiah Aizawl rawn pan leh an tum a ni.

Silai hman khap

Mamit district magis­trate VL Remliana chuan Mamit district-ah sorkar thuneitu aṭanga silai hman phalna nei lo chu silai an chelek phal a nih loh thu a tarlang a; thu pek hian dan leh thupek kengkawhtute a huam lo.

Hualtu-ah in kâng

Nimin chawhma dar 10 vel khan Hualtu khuaa Sangzika in, Assam type a kâng a, bungrua chuh hman lohin a kâng ral. Thu dawn danin, in a kan ṭan laiin a neitute inah an awm lo a, ṭhenawm khawvengte'n ṭhelh an tumnaah gas puak vangin tlangval pakhat a hliam a, damdawi-inah hruai a ni.