Manipur : BJYM President hlui man

Manipur police-te chuan October 14 zana inkahna thlenga mawhphurtu berah puh, Bharatiya Janata Yuva Morcha (BJYM) Manipur unit president hlui, Manoharmayum Barish Sharma chu an man.

October 14 zana Imphal police station huam chhung, Kwakeithel Konjeng Haraji Leikai-a inkahna thlengah khan mi panga an hliam a, an zingah hian hmeichhe pakhat a tel.

Police-te chuan he pawikhawihnaa mawhphurtu bera puh, Sharma hi Inrinni liam ta zan khan manin, Pathianni khan Imphal West district magistate hmaah hruai a ni a, October 25 thleng policy custody-ah awm ang. Sharma hi Arms Act hnuaiah thubuai siamsak a ni a, curfew order bawhchhia leh tualthah tuma puh a ni. He pawikhawihna thleng kaihhnawihah hian police-te chuan mi dang panga an man tawh bakah, motor pakhat an man tel bawk. Mahse an silai hmante erawh man tel an la ni lo.

Underground group member kut aṭangin ralthuam man

Imphal West district-a underground group member pakhat hnen aṭangin silai mu tam tham tak bakah ralthuam dang eng emaw zat an man tel tih police-te chuan an sawi bawk.

Police chuan an mi man hi a hming leh nihna erawh an puangzar lo a, thu an dawn bawhzuia an zawn hnuah an man thu an sawi a, Imphal West District police kutah hlan a ni tih an tarlang.

Moreh border-a police commando dah belh duh lo

Manipur sorkarin Myanmar ramri, Moreh khuaa police commando eng emaw zat a dah belh chu tribal pawlin an duh lo. Kar liam ta Inrinni khan tribal hmeichhiate chuan police dah belh duh lohna lantirin Chikim khuaah sit-in protest an huaihawt.

Tribal pawl hrang hrangte chuan Imphal Valley-a police-te la chhuak a, tribal area-a dah belh tum a ni mek tih sawiin, hei hi an duh loh thu leh, boruak muanawm awm tur pawh a tihchhiat theih tur thu an sawi. Committee on Tribal Unity (COTU) chuan thuchhuah siamin, "Buffer zone leh Moreh khaw huam chhunga venhim ngai laite veng turin para-military force leh Indian Army ṭhahnem tak an awm reng a, heti chunga zan lama chopper hmanga Meitei police an rawn dah belh hi thil ngaihtuah zui ngai tak a ni," an ti. Tun hnaia police-ten Imphal East district aṭanga silai mu leh ralthuamte an man ṭeuh nia an sawi pawh lemchanna mai a nih thu an sawi bawk.

Kuki Inpi chuan Imphal-Moreh road-a Kakching Lamkhai leh Wangjing area-a Meitei-ten chekpoint an siam chu ṭhiah tir turin thuneitute an phut. Meitei-te hian Moreh leh Tengnoupal sub-division tana mamawh phurh luh turte chu an lo dang niin an tarlang.