Assam Rifles insawn theih loh chhan sorkarin a tih tur a la tih kim loh vang

Assam Rifles-te'n Aizawl khawpui laili aṭanga Zokhawsanga insawn duh lohna an nei lo a, an harsatna ber chu Mizoram sorkarin a tih tur a la tih kim loh vang a nih thu leh state sorkar hmalak danah thil tam tak a innghat.

Thuthar thehdarhtu ṭhenkhatin an kawmnaah AR mi leh sate chuan, sorkar laipuia Ministry of Home Affairs (MHA)-in Zokhawsanga insawn tura a tih a, an mamawh turte a awm kim ṭhat bawk chuan insawn mai tur an nih thu an sawi a, "Insawn leh insawn lohah harsatna kan nei lo a, duh lohna kan nei lo. Tuna kan harsatna leh kan la insawn theih loh chhan chu state sorkarin a tih tur a la tih kim loh vang a ni a, insawn leh insawn loh chu sorkar hmalak danah a innghat," an ti.

Aizawl aṭanga Zokhawsanga AR insawn chungchangah inremna thuthlung duan a ni a, MHA-ah thawn a nih tawh thu sawiin, "Tun thlengin MHA aṭangin chhanna kan la dawng lo," an ti. Aizawl chhuahsan duh loh vangin chhuanlam an siam kual nia Mizoram sorkar hotu ṭhenkhatin an sawi chungchangah, "Chhuanlam kan siam kual lo a, insawn turin state sorkarin a tih tur a la ti kim lo zawk a ni," an ti bawk.

Zokhawsanga insawn thei an la nih loh chhan chungchangah, "Harsatna lian ber pakhat chu tui a ni. Tun dinhmunah water supply a la chhe hle a, tuna tui pek danin tuna mi tlemtê awm tawhte pawh a châwm zo lo a, insawn vek tur phei chuan tihngaihna a awm lo," an ti a; Zokhawsangah AR company pakhat an awm mek a, a awm ngaite awm reng loin, an inthlâk kual ṭhin thu an sawi.

Assam Rifles mi leh sate chuan, Mizoram sorkarin tun thlengin by-pass road an la siam loh thu sawiin, lo/huan neitute feh kawng tur by-pass road la awm ṭha lo chu an harsatna lian tak pakhat a nih thu an sawi a; power supply ṭha a awm theih nan transformer bun a la nih loh thu te, a panna kawng a zìm thute an sawi bawk.

Zokhawsangah hian AR mi eng emaw zat an awm tawh a, an huam chhungah a chhehvela lo/huan neitute kaltlang an phal loh avangin July 10, 2023 khan Khuangkhau Lui Zau Association leh Zokhawsang Farmers Society ten AR-in Zokhawsang an panna kawng laih chah tumin JCB nen an thawk chhuak a, police-in an dang a ni. July 10 vêk hian inremna siam a ni a, inremnaah chuan, by-pass road (AR hmun hêlna kawng) a rang thei ang bera siam a nih theih nan PWD chu hma la nghal tura tihna a tel.

Lo/huan neitu pawlte'n tarlan danin, July 9, 2023-a an tarlan danin, Zokhawsanga AR ram luah piah lama ram hectare 1,592 vela zauah revenue pass 700 vel a awm a, chhungkaw 100 aia tlem loin eizawn nan an hmang. Mizoram sorkara Home department, AR leh MHA hotute video conferencing hmanga an meeting-ah Home department hotute'n Zokhawsangah vantlang kawng siam peih vek a nih tawh thu an sawi tih an tarlang.