Manifesto 80% tihlawhtling anga sawi, mipui rilru hruai kâwi tumna a ni - MPCC

Mizoram Pradesh Cong­ress Committee (MPCC) hruaitute chuan nimin khan Congress Bhavan-ah thuthar thehdarhtute an kâwm a; MNF adviser Lalruatkima, minister-in kum 2018 inthlanpuia MNF manifesto zinga 80% an tihlawhtling anga a sawi chu mipui rilru hruai kâwi tumna a nih thu an sawi.

MPCC treasurer Dr Lal-malsawma Nghaka chuan, Lalruatkima'n October 21, 2023 khan thuthar theh­darhtute a kawmnaah an mani­f­esto 80% an tihlawh­tling tawh anga a sawi chung­changah, "He thil hi thu belh­chian dâwl lo leh mipui rilru hruai kawi tumna a nih avangin a nihna dik tak han tarlan a ṭulin kan hria," a ti.

MNF hotupain SEDP-ah Rs 3,00,000 an sem tur thu a tlangaupui tih sawiin Dr Lalmalsawma chuan, "SEDP hi chhungkaw 1,20,000-in dawng tawha chhût a ni a, first phase-ah chhungkaw 60, 000 hnenah Rs 50,000 ṭheuh pek a ni tawh a, hei hi Rs 3,00,000 aṭangin 16% chauh a ni," a ti a; second phase-ah chhungkaw 60,000 dang hnenah Rs 25, 000 ṭheuhin first instalment sem tawh a nih thu a sawi.

MPCC Treasurer chuan, CM-in Lengpui Airport chei ṭhata India rama airport cute ber pawla siam a tum tih sawiin, "Cheng vbc. 19.95 sénga an sak ṭhat laiin a chim rup mai a ni. Hengte hi hlawhtlinna kan ti zel dawn em ni? Airport sak lai chim vang hian hrem an awm tawh em? Tute nge mawhphurtu tih hi mipui hian an hre duh a ni," a ti.

CM-in Aizawl chu traffic jam awm lohna khawpuiah siam tumin kawng chhâwng leh PAHOSS a sawi ṭhin tih sawiin, "Deputy CM press statement-a a lan dan chuan 403 zingah parking space 11 chiah hawn a la ni. A awmzia chu 2.7% chiah beneficiary 403 zingah hian tihlawhtling an awm tihna a ni," a ti a; parking lot dang 392 chu engtin nge ni zel dawn tih chu an zawhna a nih thu a sawi.

Dr Lalmalsawma chuan, CM buaipui em em mau chungchang a hlawhtling tâwk lo a nih a rin thu sawiin, "Tu mahin an sawi ṭha peih tawh lo. Lengpui leh Hmunpui lama pilot project an tihte khu engtiang taka hlawhtling nge tih video nen rawn tarlang thei se a duhawm viau. A nursery leh a chi supply kaihhnawih vela hlawhtling tate chanchin pawh chiang zawka hriat hi mipuiin kan châk a ni," a ti.