Infiamna ruhrel din bakah infiamna páwl leh infiammite kan ngaihsak dawn - ZPM

ZPM party hruaitute chuan nimin khan Aizawl Press Club-ah thuthar thehdarhtute an kâwm a; sorkarna an chan chuan infiamna ruhrel din bakah, infiamna lam khawihtu pawlte leh infiammite an ngaih pawimawh dawn thu an sawi.

Aizawl West-II biala ZPM candidate Lalnghinglova Hmar chuan, Mizoramah infiamnain nasa takin hma a sawn chu ZPM-in lawmawm an tih thu sawiin, "Hetih lai hian, sport hmasawnna kan tih hi a khai rual tâwk lo deuhin kan hria. Infrastructure lamah nasa takin kan ṭhang a, sport person-te hian ngaihsak an hlawh tâwk lo a, hei hi thlâk kan tum," a ti.

Lalnghinglova Hmar chuan kum 2019-2023 chhungin MSSC hnuaiah project lian tham 108 thawh theih a ni chu lawmawm an tih thu sawiin, "Infiammite dinhmun erawh a la hniam. North East Olympic Games, Shillong-a neihah khan hmarchhak state pariat zingah parukna kan ni a, kan result hi a tlàwmthlak ang reng," a ti a, Mizoramin infiamna lama dah sàn ngai loh Arunachal Pradesh a phak loh thu a sawi.

Infiamna lama hmasawn turin hmunhma neih ṭhat bakah, a buaipuitu pawlte thuam chak a pawimawh thu sawiin Lalnghinglova chuan, "Sports association ṭhenkhat chuan national competition-a an tel dawnin sum leh paiah harsatna an tâwk nasa a, mimal sum pûk chawpte pawh an awm ṭhin. Sorkar tan puih vek sèn an ni lo chungin sports promotional fund hi ZPM a sorkar chuan ennawn kan tum," a ti.

Sport association-te'n anmahni puala hmunhma an neih chu ZPM-in a ngaih pawimawh thu sawiin Tetea Hmar chuan, "A theih chin chinah state level recognise sports body-te'n an duh leh mamawh huna an hman theih turin sports hmunhmate hi sport association-te nena hman dan sawiho ṭhin a ni ang," a ti a, an ngaihdan dah pawimawh a nih tur thu a sawi.

Lalnghinglova sawi danin, MSSC hnuaia recognise sport association ni si, sports incentive cash award pek ve loh pawl 10 an awm. Chu'ng pawlte hnuaia infiammi, national leh international level-a medal late chu ZPM an sorkar chuan incentive cash award pek an tum.

Zirtirtu (coach) neih ṭhat a pawimawh an ti a, coach-te tun aia ṭhaa thuam a, training ṭha leh zirna sang zawk an neih theih nan hmalak an tum a; infiammi beisei awm deuhte chu a bika enkawl dan ngaihtuah a ni dawn a, a ṭul dan azirin sum leh pai thlenga puih an tum a ni.

Aizawl North-II biala ZPM candidate Dr Vanlalthlana chuan, Sports Minister ni mek chu contract ringawt buaipuiah puhin, "A chhung lam a ngaihtuah lo. Kum 2019-2020 khan association 23 chuan an sum dawn tur ang an dawng phâk lo a, a vaiin cheng nuai 50 vel a ni. Tun thlengin hei hi chinfel a la ni lo a, association tam takin buaina an tawh phah," a ti.

Dr Vanlalthlana chuan, Mizote ṭhatna combat sport lamah chuan Sports Minister-in tihngaihna a hre lo nia sawiin, "Kum 2019-2023 chhungin combat sport bik tan building sak zawh a la awm lo. Mahni leh ṭhiante hamṭhatna tur chauha hmalak hi a ṭha lo," a ti a, ZPM chuan combat sport an ngaih pawimawh tur thu a sawi.

Kum 2019-2023 chhungin SYS department hnuaia hna zawng zawng restricted tender hmang veka thawh a nih thu sawiin Vanlalthlana chuan, "Dan kalha tih vek a ni a, firm pali/pangain inthurualin an chháng emaw tih mai tur a ni. An party mite pawhin an helh a, tute emaw kutah sum a lut heuh heuhin an hria a ni," a ti.

ZPM hruaitute sawi danin, SYS Minister-in infiamna ruhrel lam a tuipui em em laiin, infiammite leh infiamna pawl an ngaihsak tâwk lo. Kum 2023-24 ah sport association-te chan tur sports promotional fund atan cheng nuai 215 dah a ni a, chu chu SYS budget aṭangin 0.2% vel a ni.

Kum 2019-2023 chhungin sport project 108 a awm a, chu'ng zinga 52 chu Mamit district-ah thawh a ni. Mamit district an lawmpui rualin, sport infrastructure lama hmasawnna a khairual lo lutukah an ngai a, ṭha lo an ti a ni.