Inthlan inpuahchahna ngawrh takin a kal mek

November 7, 2023-a Mizoram Legislative Assembly general election neih turah sorkar official-te ngawrh takin an inbuatsaih mek zel a; niminah pawh khan district ṭhenkhatah training buatsaih a nih bakah, chinfel ngaite buaipui a ni.

Lungleiah chuan hmeichhe hlang duty-na tur polling station (pink polling station)-a duty turte pualin nimin khan Cultural Heritage Centre-ah electronic voting machine (EVM) hman dan inzirtirna buatsaih a ni. Lunglei district-ah pink polling station 12 a awm a, duty turin presiding officer, assistant presiding officer leh polling officer mi 64 an awm.

Lunglei district tana general observer, police observer leh expenditure observer-te chuan nimin khan DC conference hall-ah district chhunga election official, SP, Expenditure Monitoring team, candidate-te leh an agent-te an kâwm a; Lunglei district election officer Ramdinliani, bawrhsapin a kaihruai. Observer-te chuan, Lunglei district-in MLA inthlan an hmachhawn tura a inpuahchahna chu lungawi thlak an tih thu an sawi.

Nimin khan Champhaiah inthlanpuia hman tur electronic voting machine (EVM) leh voter verifiable paper audit trail (VVPAT) thlanna leh chinfelna (randomisation) vawi hnihna NIC conference hall buatsaih a ni a; polling station tina hman tur EVM leh VVPAT thliar fel niin, an awmna strong room-ah chhinchhiah a ni.

Kolasib district election officer John LT Sanga, bawrhsap hoin nimin khan DC conference hall-ah MLA inthlanpuia candidate-te leh an agent-te tan election expenditure training buatsaih a ni a; campaign nana sum hman dan tur leh inthlan kaihhnawih thil hrang hrang sawihona a ni. Expenditure observer Karni Dan-in a telpui.

Nimin vêk khan Serchhip district election officer David Lalthantluanga, bawrhsap kaihhruaiin DC meeting hall-ah Serchhip district assembly constituency pathuma candidate agent-te pualin training buatsaih a ni a, Serchhip district general observer V Sampath-a'n a hmanpui.

V Sampath chuan, candidate aiawhte chu inthlanna felfai, thianghlim leh huapzo a awm theih nan thawhhopuiah a sáwm a, "Chan ṭha bik leh duhsak bik awm loa intluk tlanga candidate-te'n inthlanpui an hmachhawn theih nan Election Commission of India chuan observer turin Mizoram páwn aṭangin officer-te a tír ṭhin," a ti a; hriatthiam loh leh zawhna an neih apiang ama hnenah zawhfiah theih reng a nih thu a sawi.

Mamitah pawh district election officer VL Remliana hoin nimin khan NIC video conference room-ah Mamit district-a service voter mi 332-te tan Electronic Dispatch of Postal Ballot buatsaih a ni. October 23, Thawhṭanni zan khan Mamit district general observer Sudhansu Mohan Samal hoin electronic voting machine (EVM) leh voter verifiable paper audit trail (VVPAT) thlanna (randomization) ṭum hnihna buatsaih a ni bawk.

Hnahthial District Election Office chuan nimin khan MLA inthlanpuia duty tur polling official-te tan training an buatsaih. Hnahthial district-a MLA bial pakhat, South Tuipui chhunga kum 80 chung lam voter zingah mi 50 leh rualbanlo mi pathumin polling station-a kal loa an ina postal ballot hmanga vote thlak dilna an thehluh tawh thu leh dilna chu pawm vek a nih thu tarlan a ni.