Sorkar leh turin MNF an beisei sang

MNF party chuan thuchhuah siamin, MLA candidate atana an party-in a thlan chhuahte'n mipui ngaihzawn an hlawh hlawm hle niin an tarlang a, sorkar leh ngei beiseina sang tak an neih thu an sawi.

MNF chuan, an candidate zingah kohhran upa 12, doc­torate degree nei panga, medical doctor pakhat, engineering degree nei pali leh ram pum huap pawla hruaitu hlun ni tawh eng emaw zat an awm thu an tarlang a, "Thlan chhuah ni tura MNF candidate-te an ṭha tlangin mipui ngaihzàwn an hlawh hlawm hle niin kan hria a, kan lawm hle. Sorkar ṭha leh chak din tura rin ngam ṭhiau, eiru lo tura intiam ve ngai lo, eirûk tum lo vek an ni. Kan sorkar leh ngei beiseina sang tak kan nei," an ti.

Sorkar term kal mek chhungin harsatnain khawvel pum a tlâkbuak tih sawiin MNF chuan, Mizoram pawhin hripui lêng, ran pûl hri leng, lirnghing, kângmei chhuak, ramri buaina leh ṭhenawm ram buainate avangin harsatna namén­lo an tawn thu an tar­lang a; hun rálmuangah hma­­sawnna nasa zawka thawk turin mipuiin MNF duhsakna an hlan ngei an rin thu an sawi.

MNF chuan, bial tinah sorkar leh tura MNF duhsaktu leh rinna nghattu an pung zel nia sawiin, "Tun October thla chhunga MNF-a lo lut ringawt pawh mi sing chuang fé an ni," an ti a; "ZPM, Congress leh BJP kalsan a, MNF huang chhunga ram rawngbawl hna thawk zel tur hian hmun ruak a la awm zel a, MNF chu zau takin a inhawng reng a ni," an ti bawk.