Nupui hlui thattu Lalruatzela Saitual khua leh tui nihna hlîp

Saitual VC-III leh All NGO Committee chuan thuchhuah siamin, May 24, Pathian­ni chhuna Lalṭhatluang­i d/o Biakrema (L), Saitual Chawnpui Veng thattu Lalruatzela s/o Hrangzuala (L), Saitual Chawnpui Veng chu an khua leh tui nihna an hlihsak a, thiin emaw, damin emaw, Saitual-III area-ah lut tawh lo turin an hriattir.

Saitual VC-III leh NGO-te thuchhuah chuan, Lalruatzela chet dan chu an dem tak zet thu an tarlang a, "Tun hnua hetiang thil duh­awm lo hi kan khaw­tlangah thleng tawh lo se kan ti. Lalruatzela hi a tihsual phû tâwk ang ngeiin a na thei ang bera hrem ni rawh se," a ti.

Saitual Joint YMA pawhin resolution siamin, Lalruatzela chu Saitual khuaa a luh an remtih tawh loh thu an tarlang. An resolution chu Saitual District Ma­gistrate an hriattir nghal a; Lalruatzela chuan tun hma pawhin mi a lo thah tawh avangin, tun hnua pawi a khawih tawh loh nan theihtawpa hma la turin Magistrate chu an ngen a ni.

Saitual Joint YMA chuan, "Lalruatzela hi thuneitute'n a na thei ang bera hrem a nih ngei theih nan hmalak ni se tih chu Saitual Joint YMA duh dan a ni. Lalruatzela hi Saituala rawn lut tawh lo turin kan hriattir a, a rawn lut leh a nih chuan, a chungah eng pawh thleng se, ama cho chhuah a ni ang. Lalruatzela hian August 2, 2000 khan a nutei pasal Tlangthan­para, Bawngkawn, Aizawl chu a lo that tawh bawk a. Hetiang a nih avang hian engti kawng maha ngaihdam chi-ah kan ngai lo a ni," a ti.