Engineer-te'n an thawh chhan an hriat reng a tul - PHE Minister

PHE minister Zodintluanga chuan engineer-te chu mipui tana thawka, hlawh la an ni tih hre reng a, inenlet fo turin a chah.

PHE department-in nimina Art & Culture auditorium-ah Review Meeting 2016 an neih a hmanpuinaah thu sawiin Zodintluanga chuan, "Engineer-te chuan mipui tana thawka hlawh la an ni tih in hriat reng a pawimawh. In inen lêt fo a ṭul a, mipuite'n hnung lamah min nuih em. 'An in leh lo a va lian ve' te min ti em tih hi kan inen lêt a ngai," a ti.

PHE Minister chuan, review meeting-ah a ṭul a nih chuan inhnial ngam a ngaih thu sawiin, "Review meeting kan nei fo a, inhnial loin kan tluan ṭhin. Inhnial kan hreh lutuk a, hei hi kan thlak a ngai tawh a ni," a ti a, hei hian rah ṭha a chhuah tur thu a sawi.

Mipui hmasawnna turin sorkarin thawktu a ruai ṭhin tih sawiin Zodintluanga chuan, "Mipui hnena tui in tur thianghlim pe tura rawih kan ni a, kan ngaihpawimawh hmasak tur chu keimahni ni loin mipui an ni," a ti.

PHE Minister chuan, hna awm dan inhriatpui tawnin thawhhona ṭha a siam thu sawiin, "Langtlang taka hna kan thawhho zel chuan harsatna kan nei lo ang," a ti a; PHE engineer-te chu inpawh taka thawkho zel turin a fuih.

SMS hmanga tui sem hun tur mipui hriattir lawk an nih avangin mipui an lawm tih sawiin, Zodintluanga chuan, "Zaah zain la famkim lo mah se, SMS Blast vangin mipui an hlim a, tunah Aizawl aia changkang hretin Serchhip Division-in SMS-in tui sem hun darkar thlengin an hrilh thei a, a lawmawm hle a ni," a ti.

PHE Division dang, SMS hmanga tui sem hun tur hriattirna mipui hnena pe tura tih tun thlenga la ti lote chu an harsatna a hnena hrilh turin Minister chuan a hriattir a ni.

Review meeting hi PHE secretary Lianchungnunga'n a kaihruai a; parliamentary secretary (PHE) Hmingdailova Khiangte pawhin thu a sawi.

PHE superintending engineer Anup Chhetry chuan 'Review of physical and financial achievement of works under NRDWP' a sawi a; SE dang HC Lalnunzira'n 'Review of physical and financial achievement of works under NLCPR, 10% Lumpsum Projects, NEC etc.' a sawi bawk.