Tlang ram lo neih 50%-in a tlahniam - Agriculture Minister

Mizoram Agriculture Service Association (MASA) chuan nimin khan Tourist Lodge, Berawtlangah General Conference an hmang a; khuallian, Agriculture minister R Lalzirliana chuan, Mizoramah tlang ram lo neih 50%-a a tlak-hniam tawh thu a sawi.

R Lalzirliana chuan, System of Rice Inten-sification (SRI), Im-proved Package of Practices (IPP) leh Hybrid Rice Technology (HRT) hmangin buh ṭhahnem tak Mizoramin a thar mek tih sawiin, "Tlang ram lo neih 50% velin a tlahniam tawh. Lo neih aia hlâwk zawk lei rem leh leiletah thlai chin leh buh thar kan duh tawh zawk a ni," a ti.

Agriculture Minister chuan, sum tam tak aiin ei leh bara intodelh a hlu zawk tih sawiin, scheme leh project hrang hrangte uluk taka zir ṭhin turin Agriculture mithiamte a chah a, "Tunah hian kut hnathawktute tan eizawnna ngêlnghet leh rahbi thar rualrem zawk an neih theih nan sorkarin NLUP hmangin chak takin hma a la mek a ni," a ti a; Agriculture officer-te chu ṭhuthmun
aṭang ringawt ni lo, a hmun ngeia lo neitute enpui ṭhin turin a chah.

Agriculture director Dr C Lalzarliana pawhin thu sawiin, sorkarin department tana thil a tihsakte a sawi a, "Mizo-ram mai ni lo, hmarchhak state zawng zawng tana ṭangkai pha tur Indian Institute of Oil Palm Research (IIOPR) leh Mizoram sorkar
ṭangkawpin Oil Palm Seed Garden min siamsak a, hei hian Mizoram chu oil palm chìnna hmun pawimawh lehzualah a hláng chho a ni," a ti.