Dept.-te'n Referral Hospital Tihchangtlun dan tur sawiho

PWD, PHE, Power & Electricity leh Health department hotute chu nimin khan Health minister Lal Thanzara hoin CMO conference hall-ah an ṭhukhawm a; State Referral Hospital tihchangtlunna kawnga harsatna awm thei hrang hrangte leh a sutkian dan tur an sawiho.

Meeting-ah hian State Referral Hospital-in Medical Council of India (MCI) tehfung hrang hranga a tlin ngei theihna atan ruahmanna an siam a ni.

PWD chu damdawi-in compound chhung in-kalpawhna leh Mual-lungthu leh Khumtung inkar kawng leh Samtlang leh Hualngohmun inkar kawng siam mekte chak zawka bawhzui tura tih an ni a; PHE department chu hnianghnar leh chatlak loa tui pe tur leh, damdawi-in leh thawktute chênna (quarters)-a tui sem darh hna chak zawka thawk turin an ti.

Damdawi-inin êng mumal tak leh voltage sang zawk a mamawh reng dawn avangin P&E department chu Health department hotute nen inráwna hma la tura ngen an ni bawk.