M/S 91-in headmaster an nei lo

School Education department chuan thu-chhuah siamin, Mizoram pumah headmaster nei lo sorkar middle school 91 an awm niin a tarlang a, "Heng hmun ruak hnawhkhah nan hian sorkarin phalna min pe tawh," an ti.

Education department thuchhuah chuan, sorkar middle school-a head-master dah turin sorkarin a phalsak tawh angin department-in a chak thei ang bera an bawhzui thu a tarlang a, "Tunah hian MPSC-ah DPC meeting nei tura chhawpchhuah mek a ni tawh a, tihfel a nih veleh promotion hmu tharte chu hmun ruakahte dah tum a ni," tiin, chu chuan headmaster neih loh vanga harsatnate a sutkian a beiseiawm thu a tarlang.

High school-ah pawh Mizoram pumah head-master nei lo H/S 38 an awm nia sawiin, School Education department chuan, "Maths leh science subject zirtir thei (B.Sc) nei lo H/S pakua an awm a, B.Sc pakhat chauh nei H/S 50 lai awm mek a, chu'ng zingah chuan Thingsai H/S pawh a tel ve a ni," an ti.

School Education department tarlan danin, H/S tam takah science leh mathematics la thei zirtirtu indaih loh chhan chu, tun hma aṭangin mathematics leh science teacher bik lakna tur recruitment rules a awm loh vang a ni. Tunah chuan mathematics leh science zirtirtu lak theihna tur rules siam a ni tawh.

Tun dinhmunah sikul hrang hranga zirtirtu indaih lohna chu rang taka sutkian mai dan a awm rih lo tih sawiin, Education department chuan, "A ṭul ang leh theih ang angin hmalak mek zel a ni a, minister leh parliamentary sec-retary-te bialah pawh headmaster leh zirtirtu indaih lohna hi a awm ve tho. A theih ang anga sorkar hmalak mekna hrethiam a, lo ngaichâng turin kan inbeisei a ni," an ti.