Intlân chhawk leh chhiah tihpun duh lo

Zoram Taxi Owners' Association (ZTOA) leh Zoram Taxi Drivers Association (ZTDA) hruaitute chuan, nimin khan Aizawl Press Club-ah taxi chungchanga sorkar thutlukna an duh lohte an puang.

ZTDA president R Pahlira chuan, chhiah a san ruala taxi, maxicab leh sumdawnna lirthei dangte life time tax lak a ni chu ná an tih thu a sawi a, "Kan tlin loh tur a ni tih a chiang, kan thawh chhuah a tlem si. Tax an rawn sanna hi 6% a ni a, nupui fanau châwmna atan loan lain taxi kan nei ve hram hram a ni. Keini mi harsa zawkte hi sorkar hian min ngaihtuahin, min sûtsak leh hrâm se kan duh," a ti.

Aizawla taxi intlan chhâwk an duh loh thu sawiin R Pahlira chuan, "State Transport Authority-in chhiah min tuk ṭeuh laiin, Coordi-nation Commiittee on Traffic Management-in hna thawk tlem zawnga hma min laksak leh si hi hriatthiam harsa kan ti," a ti a; chhiah chawi tur a tam ruala hna thawh hun tihtawisak an ni chu lungngaithlak an tih thu a sawi.

ZTDA President chuan, all Mizoram plying permit tihtawp chu sût leh ni se an duh thu a sawi a, "Permit hi kan area páwn kal theihna atan kum khatah Rs. 1,000-in kan la a ni. Road permit hi office hour-ah chiah lak theih a ni a, emergency thilah zing leh zan bakah sorkar chawlhah a buaithlak a, mipui leh keini hi a tuartu kan ni," a ti.

R Pahlira sawi danin, all Mizoram plying permit tihtawp a nih hian, Aizawl taxi-te chu Lengpui pawh kal phalsak an ni lo a, mahse sawiselna a awm hnuah Lengpui bik chu phalsak an ni. Plying permit tihtawp hi district dang pawhin an duh lo hle a, district dangah chuan auto-rickshaw a tam avangin, an sum hmuhna ber khawpui páwna tlan theih a nih dawn loh avangin an buai hle a ni.

Taxi motor hlui, motor a thara thlak phalna pawh tihtawp a ni tih sawiin R Pahlira chuan, "Danin a phal angin taxi kum 10 tling chin a thara thlak phalna tihtawp a nih hnua, accident tawkte tana thlak phalna pawh tihtawp a ni leh tawh. Taxi hmanga eizawngte tan chuan a pawi hle a, thlak ngai thlak thei loa kan awm avangin kan buai hle a ni," a ti.

ZTOA president Laldawngliana chuan, sorkar do hrim hrim zawnga kal an tum loh thu sawiin, "Sorkar hian min khawngaihin, kan harsatnate mi hriat-thiampui se kan duh a ni," a ti a; an thil phûtte tihhlawhtlinsak turin sorkar chu an ngen tak meuh tih a sawi.