KHAWTHLIR

Health camp

AH&Vety departemnt chuan, nimin khan Chhiahtlang community centre-ah Awarness Campaign cum Animal Health Camp an buatsaih a, ran hriselna endik a nih bakah Vety doctor-te'n ran vulh tura thil pawimawh hrang hrangte mipuite an zirtir.

Railway budget

Union Railway minister Suresh P Prabhu-a'n nimin Parliament House-a Railway budget a pharah hmarchhak biala Mizoram leh Manipur chu rel kawng lian, broad gauge hmanga thlun zawm a nih tur thu tarlan a ni.

Synod tanpuina

Mizoram Synod chuan tun hnaia harsatna hrang hrang tâwkte hnenah Synod Relief Fund
aṭangin chhawmdawlna sum Rs. 1,08,000 an sem. Ṭanpuina an pekna khuate chu Zokhawthar, Khawhnai, Lungleng-I, Phungphun, Khawrihnim, Baladhon, Konokpur leh Chhiahtlangte a ni a; damlo leh lirnghing tuarte hnenah an pe a ni.

MSHCS thu

Mizoram State Health Care Society (MSHCS) Governing Body chu nimin khan CMO conference hall-ah Finance minister Lalsawta leh Health minister Lal Thanzara hoin an ṭhu-khawm. Health Care Scheme leh Rashtriya Swasthya Bima Yojana (RSBY) kalpui dan leh hmasawnna tur kawng hrang hrang an sawiho a ni.

Opium man

Saihaa Excise & Narcotics department mite chuan Nilaini zan dar 8 khan Kawlchaw East-ah opium kg. 3 leh a neitua puh mi pathum - Khupkhanthang (42) s/o Vialkam Hmunchi, Manipur, Nelneihkimi (42) d/o Haumang, Lamka, Manipur leh R Lalhmingthanga (34) s/o Hualchhawna, Kawlchaw East nia insawite an man.

MUP khawmpui

Mizoram Upa Pawl (MUP) Aizawl South-II area chuan nimin khan Rokunga Hall, Venghnuaiah conference an hmang a, an hun hmanpuitu Social Welfare minister PC Lalthanliana chuan, MUP-te chu hnam rohlu leh chin dan ṭha bo mai tur venghimtute an nih thu a sawi.