Mizoram hmabak a êng: Governor

Governor Lt.Gen. Nirbhay Sharma chuan nimin khan Kolasib a tlawh a, Diakkawn YMA Hall-a a puala inkhawmah thu sawiin, "Mizoram hmabak a êng hle a ni," a ti.

Larsap chuan, tlawmngai pawl, kohhran leh sorkar thawhhona chu Mizoram chakna hnár a nih thu sawiin, "Neih sum, chibing leh sakhuanna vanga inthliar hranna awm ve lohna hmun a nih piah lamah ziak leh chhiar thiam tamna a nih avangin Mizoram hmabak a êng a ni," a ti a; kum nga dang lo awm turah Mizoramin nasa taka hma a sawn tur thu a sawi.

Mipui nuai 10 chuang awmna, ṭawng pakhat inhman ṭâwmna state chu state tihhmasawn har lo ber nia a hriat thu sawiin Governor chuan, "Mizorama mi chêng tlemna chu remchangah sorkar hnathawk leh hma latute'n hmang se a sâwt hle ang," a ti.

Larsap chuan, Kolasib district hmasawnna a hmuh avang-in lawm awm a tih thu sawiin, "Remna leh muanna rah a ni," a ti a; Kolasib leh district dangte chu district entawn tlak nih inchuhin intlansiak se Mizoramin a ṭhatpui ngei tur thu a sawi.

Khawvel changkang mekah inhung binga awm reng a theih tawh loh thu sawiin Governor chuan, "Mizo mipuite tan rilru zau zawk púa nasa zawka inhawn zau a hun. Hnam dang leh hmun dang aṭanga thil ṭha Mizoramah seng lut a, Mizo khawtlang nuna thil ṭha leh mawite pawh mi dangte hrilh chhawn zel hi hmasawn tum, Mizo ṭhalaite tana pawimawh hmasa a ni," a ti.

Governor hian nimin vek khan Serlui-B Hydel Project tuikhuah a tlawh a, Power & Electricity department leh NEEPCO official-te'n lo dawngsawngin, hna an thawh dan leh hmabakte an lo hrilh a ni.