Court bulah Bungkawn mipui kalkhawm

February 20, 2016 zan zanlai pelh hnua Bungkawn mi ṭhenkhat-in police duty pahnih an khawih rawn thubuai kal zelah, nimin khan Bungkawn mipuite chu inau khawmin, Aizawl District Court bulah an kal khawm a; buaina leh harsatna awm loin an ṭîn.

Thu dawn danin, police duty officer leh a driver-te khawih rawntua puha police-in an mante bail dilna chu nimin khan Court-in ngaihtuah a tum a. Bungkawn khaw-tlang chu nimin zing lam khan vantlang aurinna hmangin Court bula kal khawm turin an inhriattir a ni.

Bungkawn mi 50 vel chu chawhma dar 11 vel aṭangin Aizawl District Court bulah an kal khawm a; an punkhawm avang hian Court chuan police khawihtua puhte bail dilna ngaihtuah hun chu vawiina ngaihtuah turin a sawn hlá a ni.

Court-in bail dilna a ngaihtuah loh chhan leh a sawn hlat chhan hi thubuai neite ukil chuan Bungkawn khawtlang hruaitute a hrilhfiah. Ukil chuan, police-in an mante zinga mi Dr Lalruatfela Sailo chu Court-in interim bail a pe tawh a, amah leh mi dang parukte bail dilna chu vawiinah ngaihtuah a ni dawn tih Vanglaini palai a hrilh.