Mi5 kimchang a hriat ta

Xiaomi-in phone an siam thar, Mi 5 chu Barcelona-a Mobile World Congress-ah leh Beijing-ah a nihphung kimchang nen an tarlang ta. He phone hi kumin chhunga Xiaomi-in an phone tihchhuah tur an sawi nasat a nih avangin ngaihven a hlawh hle. China pawisa, Reminbi (Yuan) chuan 1999 a ni a, India pawisa chuan Rs. 20000 man vel tura ngaih a ni a, Mi5 Pro an tichhuak bawk ang a, India pawisa chuan Rs. 27,000 man tur vel a ni.

Mi5 Pro hi 3D ceramic cover nena thuam a ni a, a storage hi 128 GB niin, 4GB RAM a hmang a, Mi 5 pangngai thung hi 3D glass cover-a tuam a ni a, 3GB RAM niin, a storage hi 64GB a ni thung ang. A bak zawng chu a inang vek thung.

A hmai hi inchi 5.15-a hlai tur a ni a, a pang sirah SIM card tê chi slot a awm ang a, SIM pahnih a hmang thei dawn a, chu bakah chuan sunlight display nena thuam a nih avangin chhûn êngah pawh hmuh a harsa lo ang. A processor hi Qualcomm Snapdragon 820 a ni a, a cloacked speed hi 2.2GHz a ni a, Adreno 530 GPU nena thuam a nih avangin a graphic pawh a ṭha viau ang a, a hman pawh a nuam hle ang.

Android 6.0 Marshmallow a hmang dawn a, 4G pawh a support ang. Ca-mera pawh a ṭhat hmel khawp mai a, 16 MP Sony IMX298 sensor a hmang a, technology thar, deep trench isolation nena thuam tur a ni a, hei hian a ṭul loa light lo awmte a paih boin, thlalak a tifiah lehzual hle dawn. A hma lam camera hi 4MP tur nia tarlan a ni. 4axis optical image stabilisation nena an thuam avangin kal chung emaw pawhin thla la ila, a phe dawn chuang lo a ni. A battery hi 3000mAh a ni ang.