Chanchinbumite nekchep tumah ZPM ṭhalaiin IPR Minister an puh

ZPM ṭhalai chuan thuchhuah siamin, Information & Public Relation (IPR) minis­ter Lalruatkima chu a thuneihna hmanga chanchinbumite nekchep tumah an puh.

ZPM ṭhalai chuan May 23-a Chief Minister-in chanchinbumi­te a kawmnaa amah ṭawiawm­tu IPR Minister thusawi chu chanchinbumite nekchep tumnaah an ngaih thu tarlangin, "IPR Minister hian chanchinbua headline-a awm tura an lo beisei a awm loh ṭhin thu te, sorkar protocol chanchinbu lama ngaih pawimawh a ṭul thute sawiin, chanchinbumite'n heading an siam dan thlengin a sawi sel a ni," an ti.

Lalruatkima chu chan­chinbumite a duh ang anga thu chhuah tir a tumah puhin ZPM ṭhalai chuan, "Hei hi thil mak tak, thuneihna hmanga chanchinbumite nekchep tumnaah kan ngai. Democracy ramah chuan chanchinbumite'n zalenna zau tak an nei a, sorkar khalh ngiltu pawimawh tak leh a ṭul huna sorkar puitu ṭha tak an ni ṭhin," an ti a, democracy ramah chanchinbumite nekchep tum ni tawh lo se an duh thu an sawi.

ZPM ṭhalai chuan Lal­ruatkima chu IPR Minister a nihna angin press miten mipui hnena thudik an puanchhuah theihna tura a fawngvuantu a ni tih inhria se an duh thu tarlang, "Fim taka ngaihtuahna hmang tur leh chanchinbumite zalenna zah sak turin kan ngen a ni," an ti.