Official-te'n DPR siam an harsat - Chief Minister

Chief minister Lal Thanhawla chuan, sorkar official-te'n detail project report (DPR) siam an harsat avangin sorkar laipui
aṭanga sum hâi chhuah tam theih a nih loh thu a sawi.

MPCC-in nimina Lal Than-hawla Auditorium-a inhlan tharna hun an hmannaah thu sawiin Lal Thanhawla chuan, "Sorkar laipui hi DPR siam lamah ṭhahnem an ngai a, keimahni kan chak lo a, kan ti hleithei lo. An mi duh angin DPR kan siam theih loh zawk avangin sorkar laipui hian an duh angin min ṭanpui thei lo zawk a ni," a ti.

Chief Minister sawi danin, DPR siam chak loh hi minister leh MLA-te chak loh vang a ni lo a, official-te an nawr pawhin an siam chak thei lo. Sorkar hnathawkte chu ṭan la tur leh an awmna apianga ṭhahnemngai taka thawk tura nawr reng an ni.

Lal Thanhawla chuan, a kaih-hruai sorkarin sorkar ṭha leh dik siam bakah, ei leh bara intodelh a ngaih pawimawh thu a sawi a, "Ei leh bara intodelh tur hian programme ṭha tak kan nei. Leilung leh boruak ṭha tak kan ramin a nei a, hei hi kan hman ṭangkai a ngai a ni," a ti.

Mi sum díl rêng rênga awm chuan hnam a zahawm thei lo tih sawiin CM Hawla chuan, "Sum leh paiah pawh kan intodelh a ngai. Chumi tur chuan ruahmanna kan nei a, kan árkhawthimdài lo," a ti a; sorkar chu a tlachawp ni lo, ruahmanna fel tak neiin a kal niin a sawi.

Lal Thanhawla chuan, lei hnuai hausakna ngawrh taka zawn mek a ni tih sawiin, "Kan hun hmasa lam daih aṭangin kan buaipui tawh a, kum 1998 inthlana kan tlak khan lei hnuai hausakna zawngtute an bo vek, a chhan ka hre lo. Kum 10 kan sorkar tak loh avangin Tripura pawhin min lehpêl tawh," a ti.

Lal Thanhawla sawi danin, Keifang rama lei hnuai hausakna zawn mekah company-te'n lei verh tura an tih a chanve pawh verh a nih hmain lungalhthei hmuh a ni tawh a; lungalhthei an hmuh chhuah chu a ṭha ber chi nia hriat a ni.

Congress party inhlan tharna inkhawm hi MPCC vice president R Lalzirliana'n a kaihruai a ni.