Governor-in CIJWS a tlawh

Governor Lt.Gen. Nirbhay Sharma chuan, nimin khan Vairengtea Counter Insurgency and Jungle Warfare School(CIJWS) a tlawh.

Larsap chuan, India ram mai ni lo, khawvel hriat hlawh venghimtu sipaite tana intahhriamna hmun ṭha ber pawl Mizoramah a awm chu lawmawm a tih thu a sawi a, "Hel pawl hrang hrangte beih lêt zir a pawimawh tluk zetin hel pawl hrang hrangte rilru put hmang leh an pawl inkaihruai dante zir tel a pawimawh a ni," a ti.

CIJWS chuan India ram venhimna kawngah a thawh hlâwk hle tih sawiin, Governor chuan, "Khawvel ram hrang hranga remna leh muanna atan thawktu, venghimtu sipaite tan nasa takin an thawk a ni," a ti a; Mizo mipui tana ṭangkai zawka luang chhuak ṭhin turin CIJWS officer-te a chah.

Briefing room-ah Larsap hi CIJWS commandant Maj.Gen. Vivek Sehgal chuan CIJWS chungchang leh hmalaknate a hrilhfiah a; chumi hnuah CIJWS hmun a fanpui a ni.