Veterinary Polyclinic Hospital thar hawng

Chief Minister Lal Thanhawla chuan, nimin khan Khatla-a Veterinary Polyclinic Hospital din thar a hawng.

CM Lal Thanhawla chuan, sorkarin ran vulh a ngai pawimawh tih sawiin, "NLUP hnuaiah mi tam takin eizawnna atan an thlang a ni," a ti a; ran vulhte hrisel taka enkawl a nih theih nana Veterinary Polyclinic Hospital changtlung tak din a ni chu lawmawm a tih thu sawiin, "Hmasawn zel turin eng lai pawha ngaihtuahna kan vaivir reng a ṭul a ni," a ti bawk.

Chief Minister hian bawng vulhtu mi pali hnenah bawnghnute sàwrna ‘milking machine’ a hlan nghal a ni.

Hawnna inkhawmah hian khual-zahawm H Liansailova, Planning Board vice chairman leh AH&Vety minister C Ngunlianchunga te pawhin thu an sawi.

Veterinary Polyclinic Hospital hi ran vulh hriselna enkawltu doctor, kawng hrang hranga thiamna bik nei, specialist-te hmun khata an awmna tur a ni a; ran natna ven, enfiah leh enkawlna kawngah hma a la dawn a ni.

Tun dinhmunah Aizawlah ni tin ran enkawl ngai 120 ziak lut ang a ni a, clinic pan thei lo mobile case ni tin 25 a awm anga ngaih a ni bawk.

Polyclinic Hospital sak nan hian DoNER aṭangain cheng nuai 482.30 hmuh a ni a; building sak nan nuai 264.13 sen niin, bungrua leh hmanruate lei nan nuai 207.43 hman a ni.