Intlan chhawkna tur atana sticker Taxi 1,100 velin an la chhuak tawh

Traffic SP Lalthan-mawia chuan, Aizawla taxi-te hlawm thuma ṭhena March 1, 2016 aṭanga intlân chhâwk tura Coordination Committee on Traffic Management-in thutlukna a lo siam tawh chu kaltlangpui a ni dawn tih a sawi. Traffic SP sawi danin, taxi intlân chhâwkna tura sticker siam pawh nimin chawhnu lam thleng khan taxi 1,100 velin an la tawh.

Lalthanmawia hian nimin khan a pisaah thuthar thehdarhtute kâwmin, taxi intlân chhâwk tur chungchang a sawifiah a; "Intlân chhâwk hi taxi-a eizawngte hmuhsit bik vang leh harsat siamsak tum vang a ni lo a, mipui vantlang remchanna zau zawk ngaihtuah vanga tih a ni," a ti.

Traffic SP sawi danin, February 6, 2016 khan Bazar Bungkawnah darkar khat chhung lirthei tlan zat traffic police-te'n an chhiar a; hmar lam pana lirthei tlan 848 zinga 534 chu taxi niin, 314 chu lirthei dang a ni a, chhim lam pana tlan lirthei 698 zinga 421 chu taxi niin, 277 chu lirthei dang a ni.

Aizawlah ni tin lirthei 60,000 vel tlâna ngaih a ni a, taxi 3,500 vel a awm.

Aizawlah a vawi khat nan March 18, 2006-ah taxi-te intlân chhâwk
ṭanin, number kawp kim leh kawp kim lo an intlân chhâwk a; hetih lai hian taxi 2,226 (odd number 1,103 leh even number 1,123) an in report. Intlan chhâwk hi Zoram Taxi Drivers Association chuan duh loin, High Court-ah writ petition an thehlut a; mahse, HC chuan December 18, 2006-ah a hnâwl a ni.

November 24, 2016-ah notification hmangin taxi intlân chhâwk zelna tur ruahman niin, December 4, 2006-ah thla khat chhung intlan chhâwk tura tih a ni a, January 4, 2007-ah thla khat atan pawhsei a nih hnuah intlân chhâwk chu tihtawp a ni.

September 14, 2009-ah taxi-te chu hlawm pathum (A, B leh C)-ahte ṭhenin intlân chhawktir leh a ni a, June 21, 2011-ah taxi-te chu hlawm panga (1, 2, 3, 4 leh 5)-ah ṭhenin intlân chhâwk chhunzawm a ni.

Taxi intlân chhâwk chu January 31, 2012-ah Mizoram sorkarin a titawp a, tun thlengin intlan chhâwk awm tawh loin an service a; January 19, 2016-a Coordination Committee on Traffic Management thutlukna angin Aizawla taxi-te chu hlawm thum (A, B leh C)-ah ṭhenin, March 1, 2016 aṭanga intlân chhâwk tura tih a ni leh ta a ni.

Traffic SP chuan, kum 2006-a taxi intlân chhâwk ṭan tawh, kum 2012-a tihtawp chhan zawhna chu a chhàn theih loh thu a sawi a; Aizawl traffic tâwt leh lirthei tlan dan chungchanga rawtna neite Coordination Committee on Traffic Management-a thehlut tura tiha rawtna zingah private motor leh sorkar motor-te pawh intlan chhawktir rawtnate a awm tawh thu a sawi.

Hetih lai hian, Ai-zawla taxi-te chuan intlân chhâwk an duh lohna lantir nan nimin khan an service laiin taxi-ah flag dum an zár a, lungawi lohna hi kawng danga la lantir leh an tum bawk nia thu dawn a ni.