MNF-in ei leh bar dinhmun Siamṭhat kan tum - Zorama

MNF president Zoramthanga chuan, "Mizo nationalism hmelma lian ber chu Delhi sum ît ringawta khawsak leh an tel loa awm thei loa inngaihna hi a ni," a ti a; Mizoram ei leh bar dinhmun siam ṭha tur leh mahni kea din theih chu MNF thil tum lian berte zinga mi a nih thu a sawi

Zoramthanga hian nimin khan Mizo Hnam Rûna inkhawmah thu sawiin, MNF-in Socio-Economic Development Programme (SEDP) policy ṭha tak an neih sa tuai thara thuam famkim zual turin an inbuatsaih tih a sawi a, "He policy hi kut hnathawktute din chhuahna tura chhungkaw pakhat hnenah Rs. 3,00,000 ṭanpuina tura duan a ni. Congress duh loh vang ngawr ngawr ni lo, MNF policy SEDP avangin MNF-in sorkarna kan siam ang," a ti.

Tunlaiin ṭhalai leh pavalai rual an thi zawih zawih nia sawiin, MNF President chuan, "Zu kaih-hnawih deuh vek a ni a, Congress sorkarin zu a zawrh nghawng vek a ni," a ti a; police batallion-te chu zu zawrh hnan a, mi ṭhenkhat chuan sorkarin zu a zawrh hnu, kum 2016-ah ringawt pawh ni khat leh chawhma kar dan zelah police pakhat thi ang zelin an chhût niin a sawi. 

MNF senior vice presi-dent Tawnluia pawhin thu sawiin, March 1, 1996-a MNF-in independence a puan champha kum 60-na, golden jubilee lawm tur urlâwk nan, MNF
ṭhalaite’n February 29, 2016-ah Aizawlah two wheeler hmangin 'Mizo National Youth Rally' an huaihawt dawn tih a sawi a; rally-a tel turte chu MNF volunteer hun laia sipai uniform hmasa ber - kekawr dum, kawr vár leh necktie dum (sakei lu chuang) inbel vek turin a chah a ni.