Police kutthlâk pawi ti

Mizoram police chuan thuchhuah siamin, February 20, 2016 zana police officer duty leh a driver-in mi kut an tuar chu pawi an tih thu tarlang.

Aizawla zan tin patrolling party eng emaw zat khawpui him zawk nan an duty ziah tih sawiin Police thuchhuah chuan, "Hetianga duty-te leh guard hrang hrangte duty vil tura gazetted officer tlaivara zan tin duty-te zinga miin, kan ṭhalai awm khawm zinga misual ṭhenkhatte kut an tuar ta mai hi kan ngai thiam lo hle," a ti a; mimal,
ṭhian leh pawl hoin mahni thahrui chakna hmanga dan an palzûtna ramah Mizoram a chan an phal loh thu an sawi.

Police-te chuan, eng hunah pawh, mi tu pawhin khawlai leh kâwnte him tak leh thlamuang taka veivah ngamna atan siam zel an tum tih sawiin, "Chumi atan chuan Mizoram mipuite ṭawiawmna kan ngen tak meuh a ni. Thil duhawm lo a thlen leh tawh loh nan, he thil sual tihnaa inhnamhnawihte hi dan hmaah an phû tâwk hremna an tawh ngei theihna turin hma kan la zel dawn a ni," an ti.