KHAWTHLIR

Museum Week

February 22, 2016 aṭanga hman ṭan Mizoram State Museum Week chu nimin khan khâr a ni. Museum-ah hian tun dinhmunah gallery 107-ah object 723 pho chhuah a ni a, reserve collection room hran siam niin, reserve collection-ah object 3,034 dahṭhat a ni.

Harsatna sawiho

World Bank Project hnuaia Champhai-Zokhawthar kawng double lane tura laih meka harsatna awmte sutkian dan tur ngaihtuahin, nimin khan Grievance Redressal Committee chu Champhai DC Vanlalngaihsaka hoin an ṭhukhawm.

CD4 khawl chhia

MSACS hotute chuan, Aizawl Civil Hospital-a CD4 machine chu February 20, 2016 aṭangin a ṭhat loh avangin siamṭhat mek a nih thu leh, chawlhkar hnih chhung vel siam a ṭul dawn thu an sawi a; CD4 test mamawhtute hriatthiamna an ngen. HIV hrik paite'n taksaa rál dotu an neih zat enna khawl, CD4 machine-ah hian ni tin mi 43 vel en ziah anga chhût a ni.

Heroin man

Champhaia Excise & Narcotics department enforcement-te chuan, nimin zing dar 9:30 vel khan Champhai Kanan Vengah heroin gram 14 leh a neitua puh - Zoremsiama (25) s/o Zodingliana (L) leh Zoremsiami (27) d/o TC Lalchuailova, Khawzawl Kawnzar Veng nia inchhálte an man.

Thiin chhar

Isaac Mawia (38), Sihphir Venghluna khawsa mek chu nimin chawhnu dar 2 vel khan Sihphir Mêl 9-a bawlhhlawh paihnaah thia hmuh a ni. Isaac Mawia hi February 24 zân dar vêl aṭangin a awmna chin hriat lohin a bo a ni.

Mei zu man

Aizawl District Anti Tobacco Squad chuan, nimin khan Temple Square aṭanga Seventhday Tlang inkara sorkar pisa hrang hrang leh zirna-inah COTPA bawhchhia an awm leh awm loh an enfiah a, dan bawhchhia mi paruk manin, pawisa an chawitir.