Taxi-te thil phut hrang hrang Transport Minister-in a sawifiah

Transport minister John Rotluangliana chuan, nimin khan Lal Thanhawla auditorium-ah thu sawiin, taxi neitu leh khalhtute thil phûtte a sawifiah.

John Rotluangliana chuan, lirtheia life time tax an lak chu sorkar laipui ruahmanna a ni tih sawiin, "Sorkar laipui chuan life time tax hi 6% aia hniam loa lak tur a ti a, Mizoramah chuan a hniam thei ang bera lak a ni. State ṭhenkhatah chuan 12%-te lak a ni," a ti a; an duhthua an tihhniam ngawt theih a nih loh thu a sawi.

Kum 15 tlin hmain lirthei a chhe hman thei nia sawi leh life time tax sawisel an awm tih sawiin Transport Minister chuan, "Sorkar laipui ruahmanna a ni a, a kum bithliah tur zat hi kan duh duha kan lo tihdang-lam theih a ni lo," a ti.

John Rotluangliana chuan, all Mizoram plying permit tihtawp a nih chhan sawiin, "Taxi-te hi kum nga chhung atan plying permit pek vek an ni," a ti a; Aizawl bikah chuan tun hmain, hmun dangah taxi tlân a awm loh avangin all Mizoram plying permit hi kum khat atan Rs. 1,000-a pek ṭhin a nih thu a sawi.

Transport Minister sawi danin, hmun dang dangah taxi a awm tak avangin Aizawl tan bik chauha plying permit siam chu ṭha an tih loh avangin tihtawp a ni. Maxicab-te pawh an tlân duhna kawng bik zawt-in, chuta tan chuan permit an pe a, all Mizoram permit tihtawp a ni.

Aizawl khaw páwna tlan duh taxi-te chuan special permit an lak a ngai a, emergency thilah erawh chuan special permit an lak hman loh pawhin ngaihnathiamna thui tak sorkarin a nei dawn.