Tuichawngchhuah P/S kan danah Sonia hnenah Chakma-te zualko tum

Delhi-a Mizoram Chakma Alliance Against Discrimination (MCAAD) invuahte chuan, nimin khan thuchhuah siamin, Mizo Students Union (MSU)-te'n nimin tlai dar 3 vel khan Tuichawng-chhuah khuaa primary school chu an hâl niin an puh. He thil avang hian AICC president Sonia Gandhi hnenah zualko an tum thu an sawi.

MCAAD chuan, MSU nia inchhálte'n Tui-chawngchhuah P/S an hâl chu an dem thu sawiin, "MSU-te hian Tui-chawng-chhuaha P/S bakah, Chakma in ṭhenkhat an tichhia a, Chakma chhungkua 49-te chu chhuak turin an hriattir a ni," an ti.

MCAAD chuan, Tui-chawngchhuah khuaah hian Chakmate kum 40 vel an lo cheng tawh nia sawiin, sorkar pawhin sikul a din bakah, a khaw mite chu NLUP hmangin an ṭanpui a, ration card leh voter ID-te pawh a pe niin an tarlang.

MCAAD tarlan danin, Chakma chhungkua 49-te khua aṭanga chhuak tura tih an nih chungchangah Gauhati Gigh Court-ah writ petition an thehlut a; High Court chuan January 8, 2016-ah thupek chhuah-in, Chakma chhungkuate chu Tuichawng-chhuaha awm zel turin a ti a ni. High Court thutluknaa lungawi loh vangin MSU-te chuan P/S an hâl ta niin an tarlang a ni.