Mahni inah Muslim-te ṭawngṭai

Nimin kha Mosolman-te ni pawimawh Id-Ul-Fitr a ni a, Covid-19 vanga punkhawm a rem loh avang­in Mizorama Muslim-te chu mahni awm hmunah ṭheuh an ṭawngṭai.

Aizawl Mosque Committee & Mizoram Muslim Welfare Society general secretary Mamon Majumdar chuan, Mizoram puma Muslim community member-te tan thuchah a tichhuak a; an member-te chu zing dar 9-10 inkarah an chenna in ṭheuha ṭawngṭai turin a chah a ni.

Mamon Majumdar chuan, "Id-Ul-Firt hi April 25 aṭang khan ṭanin, thla khat chhung kan hmang a, hemi chhung hian zing ni chhuah hma leh tlai ni tlak hnuah chaw kan ei ṭhin. Kum dangah chuan Id-Ul-Firt lai hian ni tin tlaiah biak-inah kan ṭawngṭai ṭhin a, tunah chuan Covid-19 vangin sorkarin sakhaw thila punkhawm a khap avang leh kan fimkhur avangin mahni inah ṭheuh ṭawngṭai turin kan inngen a ni," a ti.

Mizoram sorkar leh mipui chungah Aizawl Mosque Committee-in Mizorama Muslim-te aiawhin lawmthu a sawi tih sawiin Mamon Majumdar chuan, "Kan mite'n an chhungte an châwm theih nan hna thawh tur Mizo mipuiin min siamsak a, sorkar leh task force-te'n Covid-19 vanga harsatna kan tawh hrang hrangah ṭanpuinate min pe a, kan lawm hle a ni," a ti a; Covid-19 donaa sorkar, task force leh NGO hmalaknate chu an thlamuanpui thu a sawi.

Mamon Majumdar chuan, kum dangah chuan Lammualah emaw High School Field-ah emaw a huhoa an ṭawngṭai ṭhin thu sawiin, "Mi 4,000-4,500 velte kan pung khawm ṭhin," tih a sawi a; an member-te chu Mizoram sorkar leh state/district/local level task force thuchhuahte zâwm tlat tur leh Mizoram tana ṭawngṭai zel turin a chah a ni.