Vairengte-ah mi 52,221 enfiah tawh

Mizoram luhka pui ber pakhat, Vairengtea medical screening point-ah May 24, Pathianni zan dar 9 thleng khan state pawna tangkhang rawn haw enfiah zat chu 3,191 an ni. Screening tih ṭan tirh aṭanga Mizorama lut tur endik zat erawh chu mi 52,221 a ni thung.

Vanglaini palai zawhna chhanga screening point-a duty medical officer Dr C Vanlalhlimpuia'n an chhinchhiah chin a sawi danin, inkhàrkhip hnua state páwna tangkhang, Mizoram sorkarin haw a phal hnua rawn haw enfiah mi 3,191 zinga a tam zawk, mi 2,144 chu quarantine facility-ah khung hran an ni a, mahni ina inkhung hrang tura tih mi 1,047 an awm.

Vairengtea medicial screening tih ṭan (February) aṭanga May 24, 2020 zan dar 9 thlenga Assam aṭanga Mizorama lut tur enfiah tawh zat chu mi 52,221 an ni a, lirthei 23,032 enfiah tawh a ni bawk.

Vairengte screening point-ah hian February thla khan mi 1,145 leh lirthei 235, March thlaah mi 23,909 leh lirthei 8,947 leh April thlaah mi 11,059 leh lirthei 5,880 enfiah a ni.