Zirna ṭha zawk a awm theih nan YMA-in sorkara hmalak an rêl

YMA Inkhawmpui Lian vawi 74-na chu Biate khuaah neih mek a ni a, nimin khan rorel niin, zirna ṭha zawk a awm theih nan sorkarin tun aia chak zawkin hma la rawh se, an ti a, kum 2024 kumpuan atan 'Ram leh hnam humhalh' tih an thlang.

Nimin khan Central YMA president R Lalngheta kaihhruaiin rorel inkhawm neih a ni a, rorel palai 1,579 an tel. Agenda zingah YMA khawih paruk leh sorkar kaihhnawih pahnih a awm.

Sorkar kaihhnawihah 'Quality education a awm theih nan sorkarin tun aia chak zawkin hma la rawh se,' tih chu an pawm a; police armed battalion pakhat tal din belh tura sorkar nawr rawtna erawh a tlang lo.

YMA khawih rawtna parukte chu an pawm vek a, 'Environment clearance tel lo chuan Mizoram chhungah hmasawnna hna thawh a nih tawh loh nan CYMA-in hma la rawh se,' an ti.

Kum 2023-24 CYMA budget atan ­Rs 2,01,11,760 an pawm a, YMA Inkhawmpui Lian vawi 75-na, kum 2025-a neih tur thlengtu atan Sakawrdai an thlang bawk.

CYMA general secretary Dr Lalnuntluanga tarlan danin, YMA-ah member 4,90,601 an awm mek a, mipa 2,86,858 leh hmeichhia 2,03,743 an ni. YMA branch 819, group 50 leh sub-headquarters pariat a awm mek. YMA hruaitu hlun chawimawina dawng tawh mi 3,119 an awm a, tun ṭum inkhawmpuiah hian dawng tur mi 155 an awm.

(Phek 2-ah zawm a ni)

YMA INKHAWMPUI LIAN ROREL DANGTE

1. Environment humhalhna kawngah hian CYMA-in tun aia chak zawkin hma la rawh se.

2. Hmun hrang hranga awm Zo fate kan inpumkhat leh zual theih nan tun aia chak zawkin CYMA-in hma la rawh se.

3. Social audit hi ṭha zawka kalpui a nih theih nan leh mipuiin kan hlâwkpui theih nan hmalak ni rawh se.

4. YMA-te'n sorkar department kan thawhhopuite zir chian a, thawhpui àwm chauh thawhpui tawh ni se.

5. Tuihna humhalh kawngah YMA-in uar zawk leh nasa zawka hmalak ni rawh se.